काठमाडौं – नेपाली कांग्रेसबाट मेलम्ची नगरपालिका– १० का वडाध्यक्षका उम्मेदवार अमृत खनालले मतदाताको पाउमा हजार नोट राखेर ढोग गर्दै भोट मागेको दृश्य भाइरल भएको छ । चुनावी प्रचारका लागि घरदैलो गरिरहेका उहाँले प्रत्येक घरमा यसैगरी भोट मागेको बताइएको छ ।

उक्त तस्बिर सामाजिक सञ्जालबाट सार्वजनिक भएपछि उहाँले आफ्नी फुपूलाई ढोग गरेको भन्दै सामाजिक सञ्जालमार्फत नै स्पष्टीकरण दिनुभएको थियो । उहाँले पछि प्रष्टीकरण दिएको पोस्ट पनि हटाउनुभएको बताइएको छ ।

उहाँले फेसबुक वालमा लेख्नुभएको थियो – यहाँहरू सबैलाई हार्दिक नमन तथा जय नेपाल ! मेरी फुपू दिदीको हातबाट टीका लगाए पछि मैले मेरी दिदीको पाउ ढोक्दै गर्दा बिना दक्षिणा कसरी ढोग गरूँ ? आादर र सम्मान गर्नु मेरो धर्म हो । यो सकारात्मक संस्कारलाई पनि प्रंचार प्रसार गरिदिनु भएकोमा यहाँ हरू सबैलाई हार्दिक धन्यवाद ।

उहाँले कसैलाई एक हजार त कसैलाई त्योभन्दा बढी रकम पाउमा राखेर ढोग्दै भोट मागिरहेको स्थानीयले बताएका छन् । यसरी पाउमा पैसा राखेर भोट मागिरहेकोप्रति नेकपा एमालेले आपत्ति जनाएको छ ।