दैलेख – दैलेखमा नेकपा एमालेबाट मेयरका उम्मेदवार चढ्ने गाडीमा अज्ञात समूहले आगजनी गरेको छ। आठबीस नगरपालिका मेयरका उम्मेदवार तर्कबहादुर बडुवाल चढ्ने गाडीमा अज्ञात समूहले आगजनी गरेको हो।

आठबीस नगरपालिका–४ राकमकर्णालीको खोली बजारस्थित सृष्टि होटेल अगाडि पार्किङ्ग गरेर राखेको बा १९ च ५५७९ नम्बरको स्कर्पियोमा गाडीमा अज्ञात समूहले आगजनी गरेको हो।

पाकिङ्ग गरेर राखिएको स्कर्पियोमा आइतबार रातको सवा ३ बजे अज्ञात समूहले आगजनी गरेको आठबीस नगरपालिका प्रमुखका उम्मेदवार बडुवालले बताउनुभयो । गाडी चालक गाडीभित्रै सुतिरहेको अवस्थामा आगजनी भएको थियो। गाडीको दायाँतिरको भाग जलेको छ भने मानविय क्षति भने भएको छैन्।

जिल्ला प्रहरी कार्यालय दैलेखका प्रहरी निरीक्षक नरेश विकले स्कर्पियो गाडीको पछाडि पट्टीको दाँया टायरको बाहिरी भाग जलेको बताउनुभयो । गाडीमा अन्य कुनै क्षति नभएको र थप अनुसन्धान भइरहेको प्रहरी निरीक्षक विकले बताउनुभयो ।

अहिले उक्त स्थानमा प्रहरी निरीक्षक सुरज खड्काको नेतृत्वमा प्रहरी टोली खटिएको प्रहरी निरीक्षक विकले जानकारी दिनुभयो। अज्ञात समूहले आगजनी गरेको एमालेका उम्मेदवारले प्रयोग गर्दै आएको गाडी।