दमक- दुईदिन देखिको महागठबन्धनको फराकिलो मतान्तरमा धावा बोल्दै नेकपा एमालेका उपमेयरका उम्मेद्वार अम्बिका खनालले अग्रता लिनुभएको छ ।
महागठबन्धनका उपमेयरका उम्मेद्वार रेगिना प्रसाईंसँग गणनाको सुरु देखि नै तिव्र दबाबमा रहेका खनाललाई दमक वडा नं ३ ले राहात दिएको छ । एमालेको गढको रुपमा रहेको यो वडामा रेगिनालाई भन्दा अम्बिकालाई ८ सय ११ मत बढी आएपछि अम्बिकाको अग्रता बढेको हो । यो वडाबाट अम्बिकालाई २७ सय ३९ मत आएको थियो भने रेगिनालाई १९ सय २८ मत आएको थियो । एमालेका उम्मेद्वार अम्बिका अब १ सय ४३ मतले अग्रता हासिल गर्नुभएको छ ।
यता मेयरकी उम्मेद्वार गीता अधिकारीले पनि महागठबन्धनका राम थापासँग मतान्तर घटाउनुभएको छ । ३ वडाले एमालेकी गीतालाई २६ सय ७८ मत दिलायो भने महागठबन्धनका रामलाई १९सय७१ मत मात्र प्राप्त भयो । यो वडाले एमालेकी गीतालाई प्रतिवन्दी भन्दा ७ सय ७ मत बढी उपलब्ध गराएपछि उहाँको दबाब पनि घटेको छ । अहिले रामको ९१सय ७२ मत छ भने गीताको ९हजार २ मत छ । राम भन्दा गीता १सय ७० मतले पछि हुनुहुन्छ । गठबन्धनको फराकिलो मतान्तरलाई क्रमश साँघुरो बनाउदै गएको एमाले नेताहरु बताउछन् । एमाले नेताहरुले अब केहीबेरपछि गणना सुरु हुने वडा नं ८ बाट दुवै पदमा गठबन्धनलाई फराकिलो मतान्तरले पछि पार्ने बताएका छन् ।
उता महागठबन्धनले भने आफ्नो पकड क्षेत्र वडा नं ७ बाट एमाले उम्मेद्वारलाई दबाबमा राख्ने बताएको छ ।