काठमाडौं – जनता समाजवादी पार्टी (जसपा)का सांसद प्रदिप यादवले आफूहरू गठबन्धन सरकारमा भएर पनि रोइरहेको गुनासो गर्नुभएको छ ।

प्रतिनिधिसभा बैठकमा बुधबार आगामी आर्थिक वर्षको बजेटमाथिको छलफलमा भाग लिँदै उहाँले यस्तो गुनासो गर्नुभयो ।

सांसद यादवले सरकारले पर्सामा विकास निर्माण र भएका संरचनाको पुनर्निमार्णका लागि आवश्यक पर्नेजति बजेट नछुट्याएको दुखेसो पोख्नुभयो ।

नारायणी रंगशाला, नारायणी अस्पताल र सिमरा विमानस्थलको लागि आवश्यक पर्ने बजेट नछुट्याएको उहाँको भनाइ छ । पुराना योजनाको लागि मात्रै केही बजेट छुट्याइएको र नयाँ योजनामा ध्यान नपुगेको यादवले बताउनुभयो ।

‘बजेट पार्न संघले नसके प्रदेश मातहत गरियोस्, नभए स्थानीय तहलाई अधिकार दिइयोस् । सभामुखमार्फत् म यो सरकारलाई आग्रह गर्न चान्हछु– सिमरा औद्योगिक क्षेत्रलाई घरेलु उद्योगको लागि प्रयोग गरियोस्, औद्योगिक क्षेत्रको रूपमा परिणत होस्’, उहाँले भन्नुभयो ।