काठमाडौँ – नेपाली कांग्रेस नुवाकोटका नेता मधुसुदन पाण्डे सामूहिक बलात्कारको मुद्दामा पक्राउ परेका छन् । पाण्डे असार २५ गते काठमाडौँको तारकेश्वर नगरपालिकाको मनमैँजुमा रहेको लोटस क्लबबाट पक्राउ परेका हुन् । पाण्डे सोही क्लबका सञ्चालक समेत भएको खुलासा भएको हो ।

नेपाली कांग्रेस नुवाकोट क्षेत्र-२ प्रदेश (क) को प्रवक्ता समेत रहेका पाण्डे हाल जिल्ला प्रहरी कार्यालय कास्कीको हिरासतमा छन् । काठमाडौँको कमलपोखरी (मालीगाउँ) बृतमा परेको बलात्कार सम्बन्धित जाहेरीका आधारमा पक्राउ गरेर जिल्ला प्रहरी कार्यालय कास्की पठाइएको बृत्तका प्रमुख मीनबहादुर कुँवरले दैनिकीलाई जानकारी दिनु भयो । घटना कास्कीमा भएकाले उजुरी मालीगाउँमा परेको भए पनि अभियुक्त र उजुरी दुबै पठाइएको उहाँले बताउनु भयो ।

प्रहरीले घटनामा संलग्न भएका अन्य तीन जनालाई फरार सूचीमा राखेर खोजी गरिरहेको छ । काठमाडौँमा पोखरा घुम्न जाने भनेर चारजनाले एक युवाती लिएर गएको र पोखरा महानगरपालिकको लेकसाइडमा रहेको एक होटलमा सामूहिक बलात्कार गरेर उजुरीमा उल्लेख गरिएको छ । यद्यपी पाण्डेले आफूले बलात्कार गरेको अस्वीकार गरको उनको पारिवारिक स्रोतले जनाएको छ ।

घटना लगत्तै पनि चार जनाको समूहकै कब्जामा रहेकी युवतीले काठमाडौँ आइपुगेपछि महानगरीय प्रहरी बृत मालीगाउँमा उजुरी दिएकी थिइन । सोही उजुरीको आधारमा पाण्डे पक्राउ परेका हुन् । फरार रहेका अन्य तीनजना पनि पाण्डेका व्यापारिक साझेदार रहेको प्रहरीले जनाएको छ ।