१७ वर्षीया नाबालिगमाथि बलात्कार गरेको आरोप लागेका राष्ट्रिय क्रिकेट टोलीका कप्तान सन्दीप लामिछाने अहिले क्यारेबियन मुलुक सेन्ट लुसियामा छन्।

क्यारेबियान प्रिमियर लिग (सिपिएल) खेल्न गएका लामिछाने नेपाल कहिले फर्किन्छन् टुंगो छैन। लामिछाने आबद्ध जमैका तलावाजले नेपाली समयअनुसार भोलि (बिहीबार) बिहान पौने ५ बजे सेन्ट लुसियासँग खेल्दैछ।

सिपिएल आगामी अक्टोबर १ सम्म चल्नेछ। सन्दीप आबद्ध जमैकाको अन्तिम लिग खेल सेप्टेम्बर २५ मा छ।

मंगलबार प्रहरी वृत्त गौशालामा लामिछानेविरूद्ध जाहेरी परेसँगै प्रहरीले अनुसन्धान अघि बढाएको छ।

भदौ ५ गते मध्यराती काठमाडौं-९ सिनामंगलस्थित एक होटलमा पुर्‍याएर सन्दीपले आफूमाथि पटक-पटक बलात्कार गरेको भन्दै १७ वर्षीया ती किशोरीले गौशालामा जाहेरी दिएकी छन्। त्यसअघि उनीहरू भक्तपुरको नगरकोट पनि पुगेको देखिएको छ।