मकवानपुर-मकवानपुरमा मतगणनाको लागि सर्वदलीय बैठक सम्पन्न भएको छ । उक्त बैठकले प्रतिनिधिसभा र प्रदेशसभा निर्वाचनको मतगणना बिहान ११ बजेबाट गर्ने निर्णय गरेको छ ।

सोमबार बिहान बसेको सर्वदलीय बैठकले ११ बजेबाट एकैपटक प्रतिनिधिसभा र प्रदेशसभाको प्रत्यक्ष तथा समानुपातिकतर्फको मतगणना गर्ने निर्णय गरेको मकवानपुरका मुख्य निर्वाचन अधिकृत ऋषिराम निरौलाले जानकारी दिए । 

उनका अनुसार मकवानपुरको प्रतिनिधिसभा तर्फको १ क्षेत्र र प्रदेशसभाको ४ क्षेत्रको प्रत्यक्ष र समानुपातिक तर्फको मतगणनाका लागि १० स्थान तयार पारिएको छ । मतगणना स्थलको सुरक्षा व्यवस्था कडा पर्नुको साथै मतगणना गर्नका लागि तारजाली र सिसिटिभी क्यामेरा जडान गरिएको उनले बताए । 

आइतबार भएको मतदानमा मकवानपुरमा ३ लाख ७ हजार ३३ जना मतदाता मध्ये १ लाख ५ हजार १५५ जना मतदाता रहेको क्षेत्र नम्बर(१ मा ६० दशमलव ९९ प्रतिशत मत खसेको मुख्य निर्वाचन अधिकृतको कार्यालय हेटौंडाले जनाएको छ । सो क्षेत्रमा महिला ४५ हजार ४५६, पुरुष ४६ हजार १२३ र अन्य ४ जना गरी कुल ९१ हजार ५८३ जनाले मतदान गरेका छन् । 

त्यस्तै १ लाख ५ हजार ५७८ जना मतदाता रहेको क्षेत्र नम्बर(२ मा ५७ दशमलव ५८ प्रतिशत मत खसेको छ । जसमध्ये पुरुष ४६ हजार ७२३ जना, महिला ३९ हजार ९२९ जना गरी कुल ८६ हजार ६५२ जनाले मतदान गरेका छन् ।