भक्तपुर- भक्तपुरमा बिहीवार भएको एस टी २० क्रिकेट लिगमा पुल्चोक क्रिकेट क्लव र १३ होप्सले विजयी हासिल गरेका छन् ।
सल्लाघारीस्थित सैनिक महाविद्यालयको क्रिकेट मैदानमा भइरहेको दोस्रो दिनमा टस हारेर ब्याटिंगको निम्तो पाएको किंग्स क्रिकेट क्लव १९।५ ओभरमा ९० रनको योगफलमा समेटिएको थियो । जवाफमा ब्याटिंग गर्न उत्रिएको पुल्चोक क्रिकेट क्लवले १०।५ ओभरमा ९२ रन बनाउँदै ७ विकेटले विजयी बन्यो ।
उक्त खेलको म्यान अफ द म्याच दिपक भण्डारी घोषित भए ।
दोस्रो खेलमा भने टस जितेर ब्याटिंग गरेको १३ होप्सले निर्धारित २० ओभरमा १३४ रनको योगफल निकाल्यो । १३५ रनको लक्ष्य पछ्याउँदै गरेको नेपाल क्रिकेट स्कुलले २० ओभरमा १२३ रनमात्र बनाउन सफल भयो । १३ होप्सले ११ रनले जित हात लियो । यो खेलको म्यान अफ द म्याच सुमित श्रेष्ठ घोषित भए ।
एस स्पोटर््स एण्ड इभेन्ट्सले आयोजना गरेको प्रतियोगितालाई धेरैले अभिरुचीसाथ हेरिरहेका छन् ।
प्रतियोगितामा ८ टीम सहभागी हुनेछन् । यो प्रतियोगिताको टाइटल स्पोन्सर सिम्रिक हेलिकप्टर प्रालिले गरेको छ भने को स्पोन्सर सिनामँगलस्थित क्रिस्टल डाइग्नोक्स्टिक प्रालिले गरेको छ ।
त्यस्तै अन्य प्रायोजकहरुमा तिनकुनेस्थित आइएसएमटी कलेज, काठमाडौं काँडाघारीस्थित अक्षरा स्कुल, जीसीडी एच आर एण्ड म्यानेजमेन्ट कन्सल्टेन्सी र अर्बिट इन्टरनेस्नल एजुकेसन छन् ।
प्रतियोगीतामा नगद पुरस्कार र विभिन्न पदक राखिएको आयोजक प्रमुख सर्वोच्च बस्नेतले जानकारी दिनुभयो ।
प्रतियोगिता माघ ४ गतेसम्म हुनेछ ।
यो टुर्नामेन्टमा राष्ट्यि खेलाडीसहित हरेक टिममा नयाँ खेलाडी सहभागी छन् ।
कोरोना महामारीपछि उपत्यकामा यस खालको प्रतियोगिता दूर्लभ भएकाले खेलप्रेमीहरुमा उत्साह ल्याएको क्रिकेट खेलाडी समेत रहेका आयोजक संस्थाका प्रमुख सर्वोच्च बस्नेतले जानकारी दिए ।
एस स्पोर्ट्स चर्चित क्रिकेट खेलाडी र क्रिकेटप्रेमी मिलेर सञ्चालनमा आएको हो ।
केही महिना अघि यो संस्थाले ललितपुरमा मुलुकमै पहिलोपल्ट इन्डोरको फुल कोर्टमा प्रतियोगिता गराई चर्चा कमाएको थियो ।