काठमाडौँ-आईसीसी क्रिकेट विश्वकप लिग टु अन्तर्गत त्रिकोणात्मक एक दिवसीय सिरिजमा नेपालले आज घरेलु टोली यूएईसँग खेल्दैछ । नेपाल र युएईबीचको खेल दुबई इन्टरनेशनल क्रिकेट स्टेडियममा नेपाली समयअनुसार बिहान ११:४५ बजेदेखि हुनेछ ।

दुवै टिमले अहिलेसम्म समान २९–२९ खेल खेलिसकेका छन्। सन् २०१९ देखि सुरु भएको विश्वकप लिग टुको अंक तालिकामा युएई पाँचौं र नेपाल छैटौं स्थानमा छन् । आज नेपालले युएईलाई हराएमा तालिकामा पनि पछि पार्नेछ। साथै लगातार ६ खेलमा जितकी कीर्तिमानसमेत बनाउनेछ। यो अंक तालिकाको शीर्ष ५ भित्र अटाउने टोलीको एक दिवसीय मान्यता जोगिनेछ।

पछिल्लो समय उत्कृष्ट लयमा रहेको नेपाली टोलीले सोही प्रदर्शनलाई निरन्तरता दिने प्रयासमा हुनेछ। 

यसअघि युएई सिरिजको पहिलो खेलमा पपुवान्यूगिनीलाई हराएको नेपालले काठमाडौँमा भएका सिरिजका ४ वटै खेलमा जित निकालेको थियो।