काठमाडौँ-एर्लिङ हालान्डको ह्याट्रिक मद्दतमा बर्नलीलाई आधा दर्जन गोल गर्दै म्यानचेष्टर सिटी एफए कप फुटबलको सेमिफाइनलमा प्रवेश गरेको छ ।

शनिबार राति घरेलु मैदानमा भएको पहिलो क्वाटरफाइनल खेलमा सिटीले बर्नलीलाई ६-० ले पराजित गरेको हो । जहाँ हालान्डले सिटीका लागि पाँच दिनभित्रै दोस्रो पटक ह्याट्रिक गरे । उनले यसै साता च्याम्पियन्स लिग लाइपजिग विरुद्ध एकै खेलमा ५ गोल गरेका थिए ।

यस्तै युलिजन अल्भारेजले दुई तथा कोल पाल्मरले एक गोल गरे ।

हालान्डले ३२औं र ३५औं मिनेटमा लगातार गोल गरेपछि सिटीले पहिलो हाफमा २-० को अग्रता बनाएको थियो । दोस्रो हाफमा चार गोल थप्यो । ५९औं मिनेटमा तेस्रो गोल गर्दै हालान्डले ह्याट्रिक पूरा गरे ।

अल्भारेजले ६२औं र ७३औं मिनेटमा गोल गरे । पाल्मेरले ६८औं मिनेटमा एक गोल गरे ।

एफए कप अन्तर्गत आइतबार म्यानचेष्टर युनाइटेड र फुलहम, ब्राइटन र ग्रिम्स्बी टाउन तथा शेफिल्ड युनाइटेड र ब्ल्याकबर्न रोभर्सबीच क्वाटरफाइनल खेल हुनेछ । शुक्रबारै सेमिफाइनल ड्र पनि हुनेछ ।-एजेन्सी