काठमाडौँ-सहिद स्मारक ए डिभिजन लिग फुटबल अन्तर्गत आज चार खेल हुँदैछन् । लिगको १३ औं चरण अन्तर्गत अन्तिम चार खेल हुन लागेका हुन् । 

जसमा दुई खेल दशरथ रंगशाला र दुई खेल एन्फा कम्प्लेक्स मैदानमा हुनेछ । त्रिपुरेश्वरस्थित दशरथ रंगशालामा साविक विजेता मच्छिन्द्र फुटबल क्लब र रोयल ब्लु सातदोबाटो युथ क्लबबीच प्रतिष्पर्धा हुनेछ । मच्छिन्द्र र सातदोबाटोबीचको खेल साँझ ६ बजे सुरु हुनेछ । 

रंगशालामै हिमालयन शेर्पा क्लब र त्रिभुवन आर्मी क्लबबीचको बाँकी खेल दिउँसो ४ः३० बजे सुरु हुनेछ । हिमालयन र आर्मीबीचको खेल शनिवार भारी वर्षा र चट्याङको कारण स्थगित भएको थियो । हिमालयन र आर्मीबीचको खेल ७१ औं मिनेटबाट सुरु हुनेछ । 

यस्तै एन्फा कम्प्लेक्समा चर्च ब्वाइज युनाईटेड र मनाङ मस्र्याङ्दी क्लवबीच प्रतिष्पर्धा हुनेछ । चर्च ब्वाइज र मनाङबीचको खेल दिउँसो ३ः३० बजे सुरु हुनेछ । यस खेल शनिवार रंगशालामा हुने तय भएपनि भारी वर्षाका कारण स्थगित भएको थियो । 

एन्फा कम्प्लेक्समै संकटा क्लब र जावलाखेल युथ क्लबबीचको बाँकी खेल हुनेछ । संकटा र जावलाखेलबीचको बाँकी खेल दिउँसो १ बजे ५१ औं मिनेटबाट सुरु हुनेछ ।