काठमाडौँ-यशस्वी जैसवालको कीर्तिमानी ब्याटिङप्रेरित राजस्थानले इन्डियन प्रिमियर लिग (आईपीएल) मा कोलकाता नाइट राईडर्सविरुद्ध नौ विकेटको फराकिलो जित निकालेको छ ।

बिहीबार इडेन गार्डेनमा सम्पन्न खेलमा कोलकाताले प्रस्तुत गरेको १५० रनको लक्ष्य राजस्थानले १३.१ ओभरमा एक विकेट गुमाएर भेट्टायो ।

राजस्थानको जितमा आक्रामक ब्याटिङ गरेका यशस्वीले ४७ बलमा १२ चौका र पाँच छक्कासहित ९८ रन बनाए । यशस्वीले १३ बलमै अर्धशतक बनाएका थिए । यो सँगै यशस्वी आईपीएलको इतिहासमा सबैभन्दा छिटो अर्धशतक प्रहार गर्ने खेलाडी बने ।

यसबाहेक, कप्तान सन्जु सामसनले २९ बलमा दुई चौका र पाँच छ्क्कासहित ४८ रन बनाए ।

त्यसअघि टस हारेर ब्याटिङमा आएको कोलकाताले निर्धारित २० ओभरमा आठ विकेट गुमाएर १४९ रनको योगफल खडा गरेको थियो ।

कोलकाताका वेन्कटेस ऐयरले ५७ रन बनाएका थिए । कप्तान नितिश राणाले २२, रह्मनुल्लाह गुर्बजले १८ रन जोड्दा आन्द्रे रसेल र जासन रोयले समान १० रन थपे ।

राजस्थानका युजवेन्द्र चहलले चार विकेट लिए । चहलले चार ओभर बलिङ गर्दा २५ रन खर्चिए । ट्रेन्ट बोल्टले दुई विकेट लिदा सन्दीप शर्मा र केएम आसिफले समान एक विकेट लिए ।

जितसँगै १२ खेलबाट १२ अंक जोडेको राजस्थान तालिकाको तेस्रो स्थानमा छ । समान खेलबाट १० अंक जोडेको कोलकाता तालिकाको सातौँ स्थानमा छ ।