काठमाडौँ–नेकपा एमालेका अध्यक्ष केपी शर्मा ओलीले सामाजिक सञ्जालमा मकैबारीको तस्बिर सेयर गर्दै सो तस्बिरले मन पोलेको बताउनुभएको छ । केहीदिन अघि अगाडि गरेको पाेष्टमा आएको कमेन्टको तस्बिर सेयर गर्दै अध्यक्ष ओलीले हेर्दा तस्बिर साधारण लागेपनि मन पोलेको बताउनुभएको हो ।
उहाँले लेख्नुभएको छ, ‘कहिले काहीँ आफूले लेखेका पोस्टमा गरिएका कमेन्ट पढ्दै जाँदा ताली र गाली मात्र होइन, हाम्रा समस्याका तस्बिर पनि आउँछन् । तीन दिन अगाडिको पोस्टमा आएका प्रतिक्रिया हेर्दै जाँदा खगेन्द्र पाण्डेले पोस्ट गर्नु भएको मकै बारीमा बाँदर आतङ्कको कारुणिक तस्बिरमा आँखा पुगे । हेर्दा साधारण लाग्ने यो तस्बिरले मन भने पोलिरह्यो । उहाँले तस्बिर पोस्ट गर्दै लेख्नु भएको रहेछ- ‘यसबारे पनि केही बोल्नु’ ।’
यसको प्रतिक्रियामा अध्यक्ष ओलीले अवश्य बोल्ने र बोल्नै पर्ने बताउनुभएको छ । उहाँले भन्नुभएको छ, ‘हो, अवश्य । बोल्नै पर्छ । बोल्ने मात्र होइन तत्काल समाधान हुनेगरी कदम पनि चाल्नु पर्छ । तपाईँको जानकारीका लागि हामी सरकारमा रहेका बेला स्थानीय तह मार्फत यसको केही सुरुवात पनि गरेका थियौँ, जुन पर्याप्त नहुन सक्छ । अहिले पनि त्यसलाई निरन्तरता दिँदै थप ध्यान दिनु आवश्यक छ । सबैलाई प्रतिक्रियाको लागि आग्रह गर्दछु । खगेन्द्र पाण्डेलाई धेरै धेरै धन्यवाद ।’
प्रतिक्रिया