काठमाडौं-प्रमुख प्रतिपक्ष दल नेकपा (एमाले)का सचिव एवं पूर्व मन्त्री गोकर्ण विष्टले मुलुकलाई संकटबाट पार लगाउने कामको नेतृत्व आफ्नो पार्टीले गरिरहेको दाबी गर्नु भएको छ।
नेकपा (एमाले) गण्डकी प्रदेश प्रचार तथा प्रकाशन विभागले पोखरामा आयोजना गरेको प्रचार कार्यशाला गोष्ठीमा बोल्दै उहाँले राष्ट्रिय अर्थतन्त्रको निर्माण गर्दै मुलुकलाई सङ्कटमुक्त बनाउने अभियानको नेतृत्व एमालेले गरिरहेको बताउनु भएको हो।
उहाँले आर्थिक-सामाजिक रुपान्तरण मार्फत् मुलुकमा देखिएको संकट समाधान गर्ने अभियानमा आफूहरू जुटिरहेको समेत बताउनु भयो। सचिव विष्टले मुलुकमा व्यापार घाटा चुलिँदै गइरहेको भन्दै यस्तो बेला तत्काल राष्ट्रिय पुँजीको निर्माण गर्ने कार्यमा जुट्नुपर्ने आवश्यकता औंल्याउनुभयो।
उहाँले भन्नु भयो, ‘नेपाल राष्ट्रले आज जुन प्रकारका गम्भीर सङ्कटहरू सामना गरिरहेको छ। यो संकटबाट राष्ट्रलाई माथि उठाउँदै आर्थिक–सामाजिक रुपान्तरण मार्फत् नेपाली जनताको जीवनलाई माथि उठाउने र राष्ट्रलाई सबल बनाउने यो कामको अगुवाइ हाम्रो पार्टीले गरिरहेको छ। यहाँहरूलाई थाहा छ–हाम्रो देशमा उदार पूँजीवाद मार्फत् नेपाली समाजलाई पुँजीवादतिर धकेल्ने अनेक प्रयत्नहरू चलिरहेको छ। यसबाट जोगाउँदै राष्ट्रिय पुँजीको विकास गर्ने, राष्ट्रिय अर्थतन्त्रको निर्माण गर्ने, उत्पादक शक्तिको विकास गर्ने, श्रम शक्तिलाई बलियो बनाउने, समाजवादको आधार तयार गर्दै आर्थिक-सामाजिक रुपान्तरण मार्फत् सामाजिक न्याय स्थापित गर्ने यो अभियानमा हाम्रो पार्टी अगाडि बढिरहेको छ।’
सचिव विष्टले काम गर्ने युवा जनशक्ति श्रमको खोजीमा बिदेसिन बाध्य हुने अवस्था आएको उल्लेख गर्दै त्यसलाई रोक्ने गरी एमालेले योजना तर्जुमा गरिरहेको बताउनु भयो। त्यस अवसरमा उहाँले पार्टीको प्रचार तथा प्रसार कार्यलाई विश्वसनीय र भरपर्दो बनाउनु पर्नेमा पनि जोड दिनु भयो।
प्रतिक्रिया