काठमाडौँ–नेकपा एमालेका नेता विष्णु रिजालले ३३ किलो सुन नेपाली कांग्रेसका सभापति शेरबहादुर देउवा प्रधानमन्त्री हुँदा नै फत्ते भएको दाबी गर्नुभएको छ । आज सामाजिक सञ्जालमा लेख्नुहुँदै उहाँले ३३ किलो सुनको व्यवस्थापन देउवाले नै गरेको बताउनुभएको हो ।
हिजोको प्रतिनिधिसभा बैठकमा गृह मन्त्री नारायणकाजी श्रेष्ठले विमानस्थलबाट बाहिरिएको ३३ किलो सुनका बारेमा खोजबिन गर्दा एक तोला पनि नपाएको बताउनुभएको थियो । नेता रिमालले गृहमन्त्री श्रेष्ठले झुटा बोलेको जवाफ दिनुभएको छ ।
नेता रिजालले ३३ किलो सुन नेपाल ल्याउँदा कांग्रेसको सरकार रहेको उल्लेख गर्नुभएको छ । उहाँले लेख्नुभएको छ,‘३३ किलो सुन विमानस्थलबाट बाहिरिँदा शेरबहादुर देउवा प्रम र गृहमन्त्री हुनुहुन्थ्यो, ज्ञानेन्द्रबहादुर कार्की अर्थमन्त्री, यो घटना ०७४ माघ ८ गतेको हो । केपी ओली प्रधानमन्त्री ०७४ फागुन ३ गते हुनुभएको हो । त्यसबेलासम्म तस्करहरुले सुन पुर्याउनुपर्ने ठाउँमा पुर्याइसकेका थिए ।’
नेता रिजालले योभन्दा फरक केही छ भने सार्वजनिक गर्न गृहमन्त्रीलाई चुनौती दिनुभएको छ ।
प्रतिक्रिया