काठमाडौँ–नेकपा एमालेले केन्द्रीय पार्टी कार्यालयमा विद्यार्थीको सुझाव लिन सुरु गरेको छ । पार्टी कार्यालयको अवलोकन गर्न आउने स्कुले विद्यार्थीको सुझाव संकलन गर्न एमालेले सुझाव पेटिका समेत राख्न सुरु गरेको हो ।
पार्टीको अवलोकन गर्न आउने विद्यार्थीसँग अध्यक्ष ओलीले भेट पनि गर्नुभएको छ । अध्यक्ष ओलीको निर्देशनमा नै पार्टी कार्यालयमा विद्यार्थीका लागि सुझाव पेटिका राखिएको हो । सो पेटिकामा विद्यार्थीले दिएका सुझाव आफूले पनि पढ्ने भन्दै अध्यक्ष ओलीले सुझाव अनुसार चल्ने पनि बताउनु भएको छ ।
उहाँले सामाजिक सञ्जालमा लेख्नुभएको छ,’हाम्रो पार्टी कार्यालयमा यी विद्यार्थी भाइबहिनीहरुलाई पार्टीको बारेमा जानकारी मात्र दिने होइन कि सुझाव पनि लिने भनेर सुझाव पेटिका राख्नु भनेको छु । जुन सुझावहरू म आफैँ पनि पढ्ने छु र सोही अनुरूप चल्ने प्रयास हामी गर्ने छौँ । अहिलेसम्म घुम्न आउनु भएका विद्यार्थी भाइबहिनीहरुका सुझावहरू के छन्, कमेन्ट बक्समा लेख्न सक्नु हुन्छ ।’
अध्यक्ष ओलीले पार्टी कार्यालयको अवलोकन विद्यार्थीहरू दिनहुँ आउने गरेको जानकारी दिनुभयो ।
‘आजभोलि विद्यालयहरुले विद्यार्थीहरुलाई राजनीतिक दलका कार्यालय घुमाउने र केही जानकारी लिने चलन सुरु गरेका रहेछन् । यो राम्रो सुरुवात हो । अस्ति म पार्टी कार्यालय गएको बेला संयोगले विद्यार्थीहरुसँग भेट भयो र उनीहरुसँग केही कुरा गर्ने अवसर मिल्यो’, उहाँले लेख्नुभएको छ,’हाम्रो पार्टीका कार्यालय सचिवले बताए अनुसार आजभोलि सातामा ४/५ वटा विद्यालयबाट विद्यार्थीहरू पार्टी कार्यालय अवलोकन गर्न आउँदा रहेछन् र यो क्रम बढ्दो छ ।’
देशको राजनीतिप्रति विद्यार्थीहरुको चासो र विश्वास बढाउने पर्ने भन्दै अध्यक्ष ओलीले उनीहरुलाई राजनीतिमा आउन प्रेरित गर्ने बताउनुभयो ।
प्रतिक्रिया