काठमाडौँ–कोशी प्रदेशका मुख्यमन्त्री उद्धव थापाले आज कांग्रेसबाट प्रदेशसभाका ज्येष्ठ सदस्य गयानन्द मण्डललाई राज्यमन्त्रीमा नियुक्ति गर्न लाग्नुभएको छ । मुख्यमन्त्री थापाले चलाखी गरेर ज्येष्ठ सदस्यलाई मन्त्रीमा नियुक्त गर्न लाग्नुभएको हो । 

कोशी प्रदेश अहिले सभामुख विहीन छ । यस्तो अवस्थामा उपसभामुखले संसद् नचलाए ज्येष्ठ सदस्यले चलाउनुपर्ने संवैधानिक व्यवस्था रहेको छ । ज्येष्ठ सदस्यले सभा चलाएको अवस्थामा थापाले विश्वासको मत नपाउने भएपछि उहाँले मण्डललाई मन्त्री बनाउनुभएको हो । 

असंवैधानिक काम गर्दै आउनुभएका थापाले यसपटक चलाखी गर्नुभएको छ । सर्वोच्च अदालतको आदेशले साउन १६ गते थापा मुख्यमन्त्री नियुक्त हुनुभएका हो । 

यता नेकपा एमालेले कोशी प्रदेशमा उपसभामुखको राजीनामा नगराउने भएको छ । एमालेले उपसभामुख सृजना दनुवारको राजीनामा नगराउने प्रष्ट पारेको छ । एमाले संसदीय दलका नेता हिक्मत कार्कीले पार्टीले उपसभामुखको राजीनामा नगराउने बताउनुभयो । उहाँले पार्टीले यस विषयमा उपसभामुखलाई कुनै पनि सुझाव सल्लाह नदिने जानकारी दिनुभयो ।  

यस्तै एमालेले उपसभामुखले संसद् चलाउने पनि जनाएको छ । नेता कार्कीले पार्टीले संसद् चलाउनकै लागि उहाँलाई उपसभामुख बनाएको बताउनुभयो । उहाँले संसद् नचलाउने जस्ता गतिविधि आफूहरुबाट नहुने बताउनुभयो । 

यस्तै एमालेले कोशीमा मध्यावधि निर्वाचन नहुने पनि प्रष्ट पारेको छ । 

नेता कार्कीले भन्नुभयो, ‘कोशीमा मध्यावधि निर्वाचन हुँदैन । कांग्रेस, माओवादी, समाजवादीले मध्यावधि निर्वाचन गर्न सक्देनन् । यो माग पनि होइन, आवश्यक पनि होइन र बाध्यता पनि छैन । कांग्रेस र माओवादीले अरुललाई धम्क्याएर मध्यावधि हुन्छ भनेर भोट मागिरहेका छन् । यसको कुनै सम्भावना छैन । संविधानको धारा १७६ को उपधारा ३ र ५ बाँकी नै छ । सबैभन्दा ठूलो पार्टीको हिसाबले सरकार बन्छ । यसले विश्वासको मत पनि पाउँछ ।’ 

नेता कार्कीले कोशीमा सबै भन्दा ठूलो पार्टीको हिसाबले एमालेको सरकार भन्ने बताउनुभयो । अहिलेको सरकार संविधानको गलत व्याख्या गरेर भनेको उहाँले बताउनुभयो ।