काठमाडौँ–नेकपा एमालेका अध्यक्ष केपी शर्मा ओलीले बाल दिवसको अवसरमा शुभकामना दिनुभएको छ । अध्यक्ष ओलीले सामाजिक सञ्जालमार्फत बाल दिवसको अवसरमा शुभकामना दिनुभएको हो । 

शुभकामना दिँदै उहाँले हरेकलाई भविष्य प्यारो लाग्ने भएर आफूलाई बालबालिका प्यारा लाग्ने गरेको बताउनुभएको छ । 

‘म कहिलेकाहीँ सोच्छु–म बालबालिकासँग आकर्षित हुन्छु कि बालबालिका मसँग आकर्षित हुन्छन् ! अन्तिममा म आफैँ बालबालिकासँग आकर्षित भएको निष्कर्षमा पुग्छु । म लामो समय बाँचेको छु र छोटो समय बाँच्नु छ। यिनीहरूसँग लामो समय छ’, अध्यक्ष ओलीले लेख्नुभएको छ, ‘हरेकलाई भविष्य प्यारो हुने भएर हुन सक्छ–मलाई बालबालिका प्यारा लाग्छन् । आज बाल दिवस–सबै सबै बालबालिकालाई उज्ज्वल भविष्यको कामना !’

आज ५९औँ राष्ट्रिय बाल दिवस देशभर मनाइँदै छ । ‘बालबालिकामा लगानी: सुनिश्चित भविष्यको थालनी’ नाराका साथ राष्ट्रिय बाल दिवस विभिन्न कार्यक्रम गरी मनाउन लागिएको हो ।