काठमाडौँ–कोशी प्रदेशको मुख्यमन्त्रीमा दुई जनाको दाबी पेस भएपछि प्रदेश प्रमुखले कानुनी परामर्श थाल्नुभएको छ ।  प्रदेश प्रमुख पर्शुराम खापुङ्गले कानुनी परामर्श गरेर आज साँझ ५ बजेसम्म मुख्यमन्त्री नियुक्त गर्ने तयारी गर्नुभएको हो । 

संविधानको धारा १६८ (५) अन्तर्गत मुख्यमन्त्रीको दाबी पेस गर्न प्रदेश प्रमुखले दिएको समय आज साँझ ५ बजेदेखि सकिँदैछ । सोही समयभित्र नयाँ मुख्यमन्त्री नियुक्त गर्ने तयारी थालिएको हो । 

हिजो मुख्यमन्त्रीमा दुईजनाले दाबी पेस गरेपछि प्रदेश प्रमुखले आज परामर्श गरेर नयाँ मुख्यमन्त्री नियुक्ति गर्नुहुने बताइएको छ ।  

सत्ता गठबन्धनबाट नेकपा माओवादी संसदीय दलका नेता इन्द्रबहादुर आङ्बोले मुख्यमन्त्रीमा दाबी पेस गर्नुभएको छ । उहाँले कांग्रेसका २९, माओवादीका १३, एकीकृत समाजवादीका ३ र जसपाका १ सांसदको हस्ताक्षर बुझाउनुभएको छ ।

यस्तै कांग्रेसको शेखर कोइराला पक्षले एमालेसँग समीकरण गरेर मुख्यमन्त्रीमा दाबी पेस गरेको छ । कांग्रेसका केदार कार्कीले एमालेको समर्थनमा मुख्यमन्त्रीमा दाबी पेस गर्नुभएको हो ।  

कार्कीले आफूसहित कांग्रेसका ९ र एमालेका ३९ प्रदेशसभा सदस्यको हस्ताक्षरसहित कुल ४८ जनाको समर्थनमा मुख्यमन्त्रीमा दाबी पेस गर्नुभएको छ । 

कोशीमा उपसभामुखसहित एमालेका ४० सांसद छन् । बहुमतका लागि ४७ सांसद आवश्यक हुन्छ । संविधानको धारा १६८ को उपधारा ५ बमोजिम सरकार गठनका लागि हस्ताक्षर गर्दा सांसदलाई ह्वीप नलाग्ने र स्वतन्त्र हैसियत रहने व्याख्या छ ।

कांग्रेसका ८ जना सांसदले इन्द्र आङ्बोले बुझाएको हस्ताक्षर फरक प्रयोजनमा गरिएकोले त्यसको अर्थ नहुने बताइएको छ । सशरीर उपस्थित भएर दाबी पेस गरेकोले यसलाई नै आधिकारिक हुने पत्र समेत बुझाएकाले  कार्की नै मुख्यमन्त्रीमा नियुक्त हुने जनाइएको छ ।

यसबीचमा प्रदेश प्रमुखले नयाँ खेल खेल्ने पनि कतिपयले आशंका गरेका छन् । कार्कीले आफ्नो दाबी पेस फिर्ता नलिए र प्रदेश प्रमुखले कुनै खेल नखेले कार्की नै मुख्यमन्त्रीमा नियुक्त हुने बताइएको छ ।