काठमाडौँ–नेकपा एमालेले आयोजना गरेको मध्यपहाडी (पुष्पलाल) राजमार्गको उद्घाटन गर्न अध्यक्ष केपी शर्मा ओली आजै धनगढी जाँदै हुनुहुन्छ ।

अध्यक्ष ओलीको सचिवालयका अनुसार अपराह्न ४ बजे श्री एयरलाइन्सको जहाजबाट उहाँ धनगढी जान लाग्नु भएको हो । 

आज धनगढीमा साँझ धनगढीमा कार्यकर्तासँग अन्तरक्रिया गर्ने कार्यक्रम पनि रहेको छ । भोलि बिहान ८ बजे धनगढीबाट अध्यक्ष ओली बैतडीको झुलाघाटतर्फ जाने कार्यक्रम रहेको पोलिटव्यूरो सदस्य एवं कञ्चनपुर इन्चार्ज नारदमुनी रानाले जानकारी दिनुभयो । उहाँका अनुसार बैतडी जाने क्रममा अध्यक्ष ओलीले विभिन्न ठाउँमा स्थानीय जनता, कार्यकर्ता र नेताहरुसँग अन्तरक्रिया गर्ने, त्यहाँका विकास निर्माण र जनताका समस्याका बारेमा जानकारी लिने कार्यक्रम रहेको छ ।

एमालेले मध्यपहाडी राजमार्ग अन्तरगतका २६ वटा जिल्लाको स्थलगत भ्रमण मंसिर १४ गते बैतडीको झुलाघाटबाट सुरु गर्दैछ । मंसिर १४ गते बिहान साढे ८ बजे अध्यक्ष ओलीले राजमार्गको पश्चिमी विन्दु झुलाघाटबाट अभियानको उद्घाटन गर्नुहुनेछ । झुलाघाट चिवाभञ्ज्याङ ,समृद्धिका लागि संकल्प यात्रा नाम दिएको यो अभियानमा एमालेले मध्यपहाडका जनतासँग प्रत्यक्ष संवाद गर्ने त्यहाँका समस्या, विकास निर्माणको अवस्था आदिका बारेमा जानकारी लिने तयारी गरेको छ । १ हजार ८ सय ७९ किलोमिटरको यात्रा २१ दिने एमालेले जनाएको छ । यात्रा अवधिभरि अध्यक्ष ओली सहभागी हुनुहुनेछ ।

अध्यक्ष ओलीको साथमा श्रीमती राधिकार शाक्य,स्वकीय सचिव राजेश बज्राचार्य लगायत यात्रामा सहभागी हुनुहुनेछ ।