काठमाडौँ– पार्टीले भोली देखि आयोजना गरेको मध्यपहाडी यात्राका लागि नेकपा एमालेका अध्यक्ष केपी शर्मा ओली सहित पार्टीको हाइ कमाण्ड धनगढी पुगेको छ ।
धनगढीमा पार्टी अध्यक्ष केपी शर्मा ओली, वरिष्ठ उपाध्यक्ष ईश्वर पोखरेल, उपाध्यक्ष विष्णु पौडेल, सचिव तथा सुदूरपश्चिम प्रदेशका इन्चार्ज छविलाल विश्वकर्मा, सचिव लेखराज भट्टलगायतका नेताहरु हिजै धनगढी पुगिसक्नु भएको छ । यस्तै अन्य उपाध्यक्ष, महासचिव, सचिव लगायतका शीर्ष नेताहरु आज धनगढी पुग्नुहुने एमाले सुदूरपश्चिम प्रदेश कमिटी सचिव रणबहादुर चन्दले जानकारी दिनुभयो ।
पार्टी अध्यक्ष केपी शर्मा ओलीले भोलि मंसिर १४ गते बैतडीको झुलाघाटमा राष्ट्रिय झन्डोत्तोलन गरेर मध्यपहाडी लोकमार्ग अभियानको सुरु गर्दै हुनुहुन्छ । यो अभियान २१ दिनमा पाँचथरको चिवाभञ्ज्याङ पुगेर सकिने छ ।
अभियानको उद्घाटनका लागि अध्यक्षसहितको एमाले शीर्ष नेतृत्व आज बैतडी जाने भएको छ । अध्यक्ष ओलीसहित शीर्ष नेताहरु धनगढीदेखि बैतडीसम्म गाडीमा जाने प्रदेश सचिव चन्दले बताउनुभयो । अध्यक्ष ओलीले बाटोमा स्थानीयसँग छलफल, अन्तरक्रिया गर्ने कार्यक्रम पनि रहेको उहाँले जानकारी दिनुभयो । पहाडको विकास र त्यहाँको सम्भावनाबारे स्थानीयवासी, सरोकारवाला पक्ष, उद्योगी, शिक्षक लगायतसँग अध्यक्ष ओलीले छलफल गर्ने कार्यक्रम रहेको सचिव चन्दले बताउनुभयो ।
नेपाल कम्यूनिष्ट पार्टीका संस्थपक पुष्पलाल राजमार्ग नामकरण गरिएको मध्यपहाडी राजमार्गको लम्बाइ करिब १ हजार ८७९ किलोमिटर छ । झुलाघाट–चिवाभञ्ज्याङ यात्रा तीन सातामा टुङ्ग्याउने एमाले नेताहरूले तयारी गरिरहेका छन्।