काठमाडौँ–पोखराको मणिपाल शिक्षण अस्पतालबाट बेपत्ता भएका तनहुँका एक बिरामीलाई खोज्न आज सेती नदीको ड्याम खोलिने भएको छ । उपचारका लागि मणिपाल भर्ना भएका १९ वर्षीय संगम मिश्र गत सोमबार साँझ साढे ६ बजेदेखि बेपत्ता छन् । 

ज्वरोसम्बन्धी उपचारका लागि उनलाई मणिपालको इमर्जेन्सी वार्डमा राखिएको थियो ।  बुवा हरिप्रसाद मिश्र औषधि लिन गएका बेला उनी अस्पतालबाट हराएका थिए ।

उनले सेती नदीमा हाम फालेको हुनसक्ने प्रहरीको अनुमान छ । उनलाई खोज्न सेती नदीको ड्याम खोल्न लागिएको हो ।

प्रहरीले ड्यामभन्दा तलका बासिन्दालाई आज मध्याह्न १२ देखि ४ बजेसम्म सतर्क रहन आग्रह गरेको छ ।