आठराई -नेकपा एमालेका अध्यक्ष केपी शर्मा ओलीलाई मध्यपहाडी यात्राका क्रममा लाखौं मानिसहरुले भेटे । हजारौंले आफ्ना ठाउँका समस्या राखे । सयौंले व्यक्तिगत समस्या राखे । हजारौंले ओलीको सक्रियताको प्रशंसा गरे । मध्यपहाडी (पुष्पलाल) राजमार्गलाई पछ्याउदै ओली जब आफ्नै जन्मघर पुग्नुभयो त्यहाँका छरछिमेकीले गाउँ रित्तिएकोमा धेरै चिन्ता व्यक्त गरे ।
स्थानीयहरुसँग यीनै विषयमा संवाद गरिरहेका बेला स्थायी कमिटी सदस्य गुरु बरालले अध्यक्ष ओलीले मोबाइलमा भिडियो कल मार्फत एक व्यक्तिलाई अध्यक्ष ओलीसँग जोड्नुभयो । उहाँ हुनुहुन्थ्यो ओलीका बालसखा लोकप्रसाद संग्रौला । वर्षौं अघि जन्मथलो छोडेर तराइ झर्नुभएका संग्रौला मोरङको सुन्दर हरैंचा विराटचोकमा बस्नुहुन्छ । नेपाली काँग्रेसका नेता संग्रौलाले अध्यक्ष ओलीको सक्रियताको प्रशंसा गर्दै गाउँ रित्तिएकोमा चिन्ता व्यक्त गर्नुभयो ।
‘उहाँले गाउँमा मानिस अडिएनन् के गर्ने हो बिचार गर्नुहोस है भन्नुभयो ’ स्थायी कमिटी सदस्य बरालले भन्नुभयो ‘अध्यक्षज्यूले जवाफमा बसाँइसरी गएका मानिसलाई फर्काउने योजना बनाउन कै लागि आफू मध्यपहाडको यात्रामा हिडेको जवाफ दिनुभएको छ ।’
आठराई राणाशासन देखि नै शिक्षित र सुविधायुक्त ठाउँ हो ।१९९३ सालमा भाषा पाठशाला, संक्रान्ती बजारमा रहेको त्रिभूवन मावि २००४ सालमा नै बनेको हो । त्यसैले पनि आठराई भेगका मानिसहरुले विद्यालय शिक्षाको अवसर राणाकालमा नै पाएका थिए । उच्च शिक्षाको अवसर पनि यहाँका बासिन्दाले पञ्चायती व्यवस्था सुरु नहुँदै पाएका हुन् । चुहानडाँडामा रहेका तेह्रथुम बहुमुखी क्याम्पस २०१७ सालमा नै स्थापना भएको हो । तथापी यस ठाउँबाट मानिसहरु ठूलो संख्यामा पलायन भइरहेकोमा सबैको चिन्ता छ ।
शिक्षाका लागि मात्र हैन राजनीतिक चेतना पनि यहाँ राणा शासन कै पाला देखि अब्बल थियो । यो त्यही ठाउँ हो जहाँ २००७ सालको विद्रोहमा कयौं मानिसहरु बिस्थापनमा परेका थिए । पञ्चायती व्यवस्थाको सुरुवातसँगै यहाँ कम्यूनिष्ट चेतनाको विरुवा उम्रिएको हो । जसमा रामनाथ दाहाल,केपी ओली,सिएम कङ्दङ्वा,मालेस्ताएमा दाहालहरुले पञ्चायत विरुद्धको क्रान्तीको बीउ रोपेको ठाउँ हो आठराई । दाहाललाई झापा झरेर झापा विद्रोहको सुरुवात गरे बापत २०२९ साल फागुन २१ गते आफू सहित ५ जना साथीसँगै पञ्चयाती प्रशासनले हत्या गर्यो । जसलाई आज एमालेले सुखानीका सहिद भनेर सम्मान गरिरहेको छ । त्यही विद्रोहको नेतृत्व गरे बापत केपी ओलीले २०३० साल देखि १४ वर्ष जेल जीवन भोग्नुपर्यो ।
सिपी मैनाली र आरके मैनालीहरु आठराई इवासँगै जोडिएको अर्को गाउँ आठराई फूलबारीका युवा थिए । उनीह्रुले पनि कम्यूनिष्ट राजनीतिमा लामै योगदान गरे । आरके पछि राजावादी भए भने सिपी अहिले पनि नेकपा मालेको महासचिवको रुपमा हुनुहुन्छ ।
राजनीतिक रुपमा पनि यस्ता वीर पुरुषहरु जन्माउने आठराईलाई बसाँइसराइले आक्रान्त पारेको गाउँपालिकाकी पूर्व उपाध्यक्ष रुपा लिम्बू बताउनुहुन्छ । उहाँ भन्नुहुन्छ ‘अध्यक्षज्यूलाई उहाँका साथी भाइ देखि हामी कार्यकर्तासम्मले यहाँका समस्या सुनाएका छौं । यहाँबाट मान्छे भाग्ने मूख्य कारण भनेको खानेपानी समस्या हो । खानेपानीको समस्या समाधान हुने हो भने यहाँको बसाँइसराइ रोकिन्थ्यो । रोजगारीको अवसर हुने हो भने यहाँबाट अन्त गएका मान्छे गाउँ फर्किन्थे । ’
अध्यक्ष ओलीले यस गाउँमा मानिस फर्काउनका लागि आफ्नो सबै सम्पती राज्यलाई दिएर प्राविधिक शिक्षालय स्थपना गरिदिनु भएको छ । आफू प्रधानमन्त्री भएका बेला शिलान्यास गरेको यो शिक्षालायमा अहिले कृषि,भेटनरी,इन्जिनियरिङ आदि विषयहरु पढाइ हुन्छन् । गाउँमा आधुनिक खेती प्रणालीको सुरुवात गरेर त्यसको बजारिकरण मार्फत यस गाउँको आकर्षण फेरी फर्काउने अध्यक्ष ओलीको योजना छ । यातायातको हिसाबले कुनै बेला दुर्गम रहेको यो गाउँलाई अहिले मध्यपहाडी राजमार्गले जोडेपछि पाँचथरको फिदिम नजिकिएको छ । जसका कारण यहाँका उत्पादन एकै झमटमा झापा र भारतका बजारमा पुग्ने बाटो पनि छोटिएको छ ।
यस गाउँपालिकामा २०६८ सालको जनगणनामा ४ हजार ५ सय ७८ परिवार र २१ हजार ७ सय ४७ जनसंख्या थियो । २०७८ सालको जनगणनामा घटेर यहाँ परिवारको संख्या ४ हजार ३ सय ७३ र जनसंख्या १८ हजार १ सय ५६ रहेको छ ।
प्रतिक्रिया