काठमाडौँ–झापा इनर्जी प्रालिले १० मेगावाट सौर्य ऊर्जा उत्पादन गरी नेपाल विद्युत् प्राधिकरणको प्रसारण लाइनमा जोडेको छ । शिवसताक्षी नगरपालिका वडा न. ४ स्थित बोलोचोकमा सञ्चालित झापा इनर्जी निजी क्षेत्रको सवै भन्दा बढी क्षमताको सौर्य ऊर्जा परियोजना हो ।

झापा इनर्जी परियोजनाको आगामी माघ २३ गते नेकपा एमालेका अध्यक्ष तथा पूर्व प्रधानमन्त्री केपी शर्मा ओलीले उद्घाटन गर्ने कार्यक्रम रहेको छ ।

प्यानलको १२ मेगावाट उत्पादन गर्ने क्षमता रहेको र १० मेगावट विद्युत् प्राधिकरणमा जोडिएको संघीय सांसद तथा एमाले प्रदेश कमिटी सदस्य एलपी साँवा लिम्बुले जानकारी दिनुभयो ।

साँवाले नागरिकलाई उत्पादनसँग जोड्ने उद्देश्यले परियोजना सञ्चालन गरिएको र ऊर्जालाई पर्यटनसँग जोड्नका लागि अन्य बाहिरी कामहरु सुरु गरिएको बताउनुभयो ।

 उद्घाटनको व्यवस्थापनका लागि एमाले केन्द्रीय सदस्य दीपक कार्की, कार्यवाहक अध्यक्ष प्रेम गिरी, जिल्ला सचिव शिव ढुंगेल, प्रदेश कमिटी सदस्य, एमाले नगर कमिटीले संयुक्त रुपमा छलफल गरेका छन् ।  

पूर्वपश्चिम राजमार्गको दुधेबाट १० किलोमिटर दक्षिण गाउँमा २१ बिघा क्षेत्रफलमा परियोजना सञ्चालन भइरहेको छ । सोही स्थानमा सौर्य प्यानल राखिएको छ । सांसद एलपी साँवाको नेतृत्वमा ८१ करोड रुपैयाँको लगानीमा चार वर्षअघि परियोजनाको निर्माण सुरु भएको थियो । परियोजनामा माछापुच्छ्रे बैंक र सिभिल बैंकको ७५ प्रतिशत वित्तीय साझेदारी र २५ प्रतिशत स्थानीय सेयर छ ।

 झापा इनर्जी प्रालि र प्राधिकरणबिच २०७८ मङ्सिर १२ गते विद्युत् खरिद सम्झौता भएको थियो ।सम्झौताअनुसार परियोजनाबाट उत्पादित बिजुली प्राधिकरणले प्रतियुनिट ७ रुपैयाँ ३० पैसामा खरिद गर्ने भएको छ ।