काठमाडौँ– प्रमुख प्रतिपक्ष दल नेकपा (एमाले) को जारी केन्द्रीय कमिटी बैठकमा आज निष्कर्ष सुनाइने भएको छ । समूहगत छलफलबाट आएका निष्कर्ष आजको बैठकमा सुनाउने एमालेले जनाएको हो ।  

बैठकमा प्रस्तुत चारवटा कार्ययोजनामा हिजो नौवटा समूहमा समूहगत छलफल भएको थियो । 

समूहगत छलफलमा उठेका विषयमा स्थायी कमिटीको समूहबाट सङ्गठन विभाग प्रमुख काशीनाथ अधिकारी, कोशी प्रदेशबाट अध्यक्ष घनश्याम खतिवडा, मधेस प्रदेशबाट अध्यक्ष चन्द्रेश्वर मण्डल, बागमती प्रदेशबाट अध्यक्ष कैलाश ढुङ्गेल, गण्डकी प्रदेशबाट अध्यक्ष नवराज शर्मा, लुम्बिनी प्रदेशबाट अध्यक्ष राधाकृष्ण कँडेल, कर्णाली प्रदेशबाट अध्यक्ष गुलाबजङ्ग शाह, सुदूरपश्चिम प्रदेशबाट अध्यक्ष कृष्णप्रसाद जैसी र केन्द्रीय विभाग, उपत्यका तथा सम्पर्क विशेष, जनसङ्गठन, प्रवास समूहबाट केन्द्रीय सदस्य पेम्बा लामाले आ–आफ्नो समूहको लिखित प्रतिवेदन बिहीबारको बैठकमा प्रस्तुत गर्नुहुनेछ । 

छलफलपछि आएका निष्कर्षलाई बैठकमा प्रस्तुत गरिने छ भने पार्टी नेतृत्वले त्यसलाई सम्बोधन गर्ने बताइएको छ । मंगलबारदेखि सुरु भएको एमालेको केन्द्रीय कमिटी बैठक आज सकिँदैछ ।