चितवन-चितवनमा आज बिहान एक स्कुल बसमा आगजनी गरिएको छ। चितवन भरतपुर महानगरपालिका-२०, दद्रेनीस्थित स्मल हेभन इङ्लिस बोर्डिङ स्कुलको बसमा अज्ञात समूहले आगो लगाएको हो।

सडकमा गुडिरहेको बागमती प्रदेश– ०६–००१ क ०४५ नम्बरको बस रोकेर अज्ञात समूहले आगो लगाइ दिएको हो। विहान ८ बजेतिर विद्यार्थी लिन गएको सो बसमा तीन वटा मोटरसाइकलमा आएका ६ जनाले आगजनी गरेका हुन् । बसमा रहेका विद्यार्थी र बस स्टाफलाई उतार्दै मोबाइल नियन्त्रणमा लिएर बसमा आगो लगाई सो समूह भागेको बसका चालकले प्रहरीलाई जानकारी गराएका छन् ।

भरतपुरबाट आएको दमकलले आगो नियन्त्रणमा लिएको र आगजनीको जिम्मेवारी अहिलेसम्म कसैले नलिएको जिल्ला प्रहरी कार्यालय चितवनले जनाएको छ। घटनाबारे अनुसन्धान भइरहेको जिल्ला प्रहरी कार्यालयका प्रवक्ता भेषराज रिजालले बताउनु भयो। घटनास्थल लगायत अन्य स्थानमा ठूलो संख्यामा प्रहरी गरिएको छ । घटनाको थप अनुसन्धानका लागि खटिए पनि हालसम्म आगजनी गर्ने समूह पत्ता लाग्न सकेको छैन ।