काठमाडौं-प्रधानमन्त्री केपी शर्मा ओलीले उदयपुरको चौदण्डीगढी-५ स्थित सिवाई-बेल्हा जोड्‍ने भाँचिएको पुल अब नयाँ डिजाइनमा बन्ने बताउनु भएको छ।

बिहीबार प्रतिनिधिसभामा नेपाली कांग्रेसका सांसद नारायण खड्काले सोधेको प्रश्‍नको जवाफ दिँदै प्रधानमन्त्री ओलीले भाँचिएको पुलको निर्माणका लागि नयाँ नक्साको डिजाइन स्वीकृत भइसकेको बताउनु भयो।

उक्त पुल निर्माण सकिएर गाडी चल्‍ने अवस्थामा पुगेको बेला त्रियुगा नदीमा आएको बाढीले क्षति पुर्‍याएको थियो। प्रधानमन्त्री ओलीले संसदमा भन्नुभयो, ‘ठेक्काका प्रावधान, प्रचलित सार्वजनिक खरीद कानुन तथा पर्न आएका गुनासा, उजुरीहरू समेतलाई दृष्टिगत गरेर अध्ययन, विश्लेषणपश्चात पुलको डिजाइन परिवर्तन गरेर सडक विभागबाट स्वीकृत भई सोही अनुसार कार्य अगाडि बढाउन निर्माण व्‍यवसायीलाई निर्देशन आदेश भइसकेको छ।

चौदण्डीगढी नगरपालिका वडा नम्बर-५ सिवाई-बेल्हा जोड्‍ने पुल २०६६ सालमा शिलान्यास भई ०७८ मा निर्माण सम्पन्न हुने चरणमा पुगेको थियो। तर पुलका दुईवटा पिलर भासिएर तीन वटा स्पानमा क्षति पुगेपछि पुल अलपत्र अवस्थामा छ ।

यो पुलले उदयपुरलाई खोटाङको दक्षिणी भेग र भोजपुरको पश्चिमी भेगलाई तराई-मधेशसँग जोड्ने गर्दछ। साथै उदयपुरकै चौदण्डीगढी नगरपालिकाको वडा नम्बर ५, ९ र १० का करिब २० हजार जनसंख्यालाई नगरको केन्द्रसँग सिधा सम्पर्क गराउँछ। तर पुल निर्माण सम्पन्न नहुँदा जिल्लावासीलाई आउ-जाउ गर्न समस्या भएको छ।