काठमाडौं-अर्थमन्त्री विष्णु पौडेलले निर्माण सम्पन्न गरिसकेका निर्माण कम्पनीहरुको रकम भुक्तानी दशैं अगाडि हुने आश्वासन दिनु भएको छ।

आज अर्थ मन्त्रालयमा नेपाल निर्माण व्यवसायी महासंघका प्रतिनिधिहरुसँगको छलफलमा निर्माण सम्पन्न गरिसकेका कम्पनीहरुले पाउनुपर्ने बक्यौता भुक्तानी प्रक्रियामै रहेकोले चिन्ता नलिन आग्रह गर्नु भएको हो।

उहाँले भन्नुभयो, ‘निर्माण व्यवसायीहरुले सम्पन्न गरेको कामको भुक्तानी पाउनुपर्छ भनेर म मन्त्री भएर आएदेखि नै भन्दै आइरहेको छु। त्यसका लागि सरकारले आवश्यक प्रबन्ध मिलाउनुपर्छ भनेर जोड दिँदै आएको छु। त्यसका लागि २० अर्ब जति भुक्तानी भएको पनि छ\। तर यो पनि सत्य हो कि त्यो पैसाबाट निर्माण व्यवसायीहरुले पाउनुपर्ने दायित्व पाइसकेको छैन । हामी सम्पन्न भएको कामको भुक्तानीका लागि काम गरिरहेका छौं । केही प्रक्रिया रोकिएको छैन। तपाईले भुक्तानी पाउनुहुनेछ । दशैं अगाडि नै हामी प्रयास गर्छौं । संसदले पास गरेको बजेटका लागि तपाईहरुले चिन्ता गर्नुपर्दैन।’

निर्माण कम्पनीहरुले पाउनुपर्ने रकम धेरै र उक्त शीर्षकमा बजेट कम छुट्याएको कारण भुक्तानीमा समस्या भएको अर्थमन्त्री पौडेलको भनाइ छ । उहाँले अविरल वर्षाका कारण आएको बाढी र पहिरोले ठूलो धनजनको क्षति भएको कारणले क्षतिबाट बाहिर निकाल्न सबै पक्ष लाग्नुपर्नेमा जोड दिनुभयो।