काठमाडौं-प्रधानमन्त्री केपी शर्मा ओली आज पनि गृहजिल्ला झापामा नै हुनुहुन्छ। प्रधानमन्त्री ओली २३ गते आइतबार गृहजिल्ला झापा पुग्नुभएको हो।

प्रधानमन्त्री ओली हिजो गृहजिल्लाको विभिन्न कार्यक्रममा सहभागी हुनुभएको थियो। आज पनि उहाँ विभिन्न कार्यक्रममा सहभागी हुने कार्यक्रम तय गरेको छ।

प्रधानमन्त्री ओलीले सोमबार बिहान १० बजे बेलडाँगी खानेपानी आयोजनाको उद्घाटन गर्नुहुने छ। त्यसैगरी, बिहान ११ बजे गौरादह नगरपालिकाअन्तर्गत महारानीझोडामा जग्गाधनीपुर्जा वितरण गर्नुहुने छ। त्यसपछि दिउँसो साढे १२ बजे गौरादह बजारमा ताजपुरिया समाजको भेलालाई सम्बोधन गर्नुहुने छ।

त्यस्तै, प्रधानमन्त्री ओलीले दिउँसो २ बजे बिर्तामोडस्थित सिटीसेन्टरमा पार्टी अगुवा कार्यकर्ता भेलालाई सम्बोधन गर्ने पार्टी जिल्ला सचिव तुलसी कार्कीले बताउनु भयो।

प्रधानमन्त्री ओलीको झापा भ्रमणलाई सफल र फलदायी बनाउने सन्दर्भमा नेपाली कांग्रेस र एमालेबीच यसअघि भएको छलफलमा आवश्यक तयारीसहित जिल्लास्तरीय योजना तथा कार्यक्रम प्रधानमन्त्रीसमक्ष पेस गर्ने सहमति भएको अध्यक्ष गिरीले जानकारी दिनुभयो ।

हिजो आइतबार प्रधानमन्त्री ओलीले झापाको मेचीनगर नगरपालिका-४, आमडाँडीस्थित मानवसेवा स्मारक भवन शिलान्यास गर्नुभएको थियो।त्यसैगरी प्रधानमन्त्री ओलीले झापाको दमक नगरपालिका-३, दापगाछीस्थित ‘दमक व्यापारिक कम्प्लेक्स’को उद्घाटन गर्नुभएको थियो ।