काठमाडौँ-नेकपा एकीकृत समाजवादीका सम्मानित नेता झलनाथ खनालले पार्टीका नेताहरूको कार्य विभाजनप्रति असन्तुष्टि जनाउनु भएको छ। सम्मानित नेता खनालले आफ्नो सचिवालय ग्रुपमा नेता-कार्यकर्तासामु कार्य विभाजनलाई लिएर असन्तुष्टि व्यक्त गर्नुभएको हो।

नेताहरूको कार्य विभाजन गर्नको लागि बसेको स्थायी कमिटी बैठकमा नेता खनाल सहभागी हुनुभएको थिएन। गत बुधबार सम्पन्न एकीकृत समाजवादीको स्थायी समिति बैठकले नेताहरुको कार्यविभाजन टुंग्याएको थियो। जसमा खनाललाई स्कुल विभाग प्रमुखको जिम्मा दिइएको थियो।

नेता खनालले भने बैठकका बेला आफू घरमै आराम गरेर बसेको बताउनुभयो । उहाँले कार्यविभाजन गर्दा आफूसँग कुनै परामर्श समेत नभएको भन्दै गुनासो समेत गर्नुभयो। ६ महिनापछि बैठक गर्दा पनि पार्टीले आफ्नो स्वास्थ्य अवस्था राम्रो नभएको बेलामा पारेको भन्दै के के एजेण्डा प्रस्तुत भए ? के–के विषयमा छलफल भयो ? कस्तो छलफल भयो र के निष्कर्ष निकालियो आफूलाई थाहा नभएको उल्लेख गर्नुभएको छ।

नेता खनालले भन्नुभयो, ‘म विगत १५ दिन देखि डाक्टरको सल्लाहमा आराम गर्दै बसेको छु। यो मेरो विगतको उपचार शृङ्खलाकै एउटा अङ्ग हो। त्यसले गर्दा म यसपटक पार्टीको स्थायी कमिटीको बैठकमा उपस्थित हुन पाइनँ। ६ महिनापछि बैठक गर्दा पनि पार्टीले त्यहीँ बेलामा बैठक पारिदियो। त्यो बैठकमा के के एजेन्डा प्रस्तुत भए ? के के विषयमा कस्तो छलफल भयो र के निष्कर्ष निकालियो मलाई थाहा छैन। मसँग कुनै परामर्श भएन । धेरै साथीहरूले देशभरिबाट मलाई सोधिरहनु भएको छ। कतिपय निर्णयहरूका बारेमा चर्को असन्तुष्टि रहेको कुरा पनि केन्द्रीय कमिटीका सदस्यहरूले व्यक्त गरिरहनु भएको छ। यस बीचमा कार्य विभाजन भएछ। त्यस बारेमा पनि धेरै असन्तुष्टि आइरहेको छ।’

नेता खनालले आफूले पार्टीको दशौँ राष्ट्रिय महाअधिवेशन पछि गर्नुपर्ने कामहरूका बारेमा केही प्रस्तावहरू पनि पठाएको बताउनु भयो। उहाँ भन्नुहुन्छ, ‘त्यसमध्ये दशौं राष्ट्रिय महाअधिवेशन र हाम्रो कार्य योजना शीर्षकमा पार्टीले तत्काल पहल गरेर गर्नुपर्ने कामहरूको योजना पनि पठाएको थिए। स्थायी कमिटीले के निर्णय ग¥यो मलाई थाहा छैन। पार्टीले महाअधिवेशनबाट क्रान्तिको लक्ष्यका रूपमा समाजवादी कार्यक्रम त्यसलाई प्राप्त गर्ने कार्यदिशा, नीति र सिद्धान्तहरू पास गरेको छ। अब ती कुरालाई व्यवहारमा उतार्ने ठोस कार्ययोजना लिएर पार्टी निर्माण, जनआधार निर्माण र जनसंघर्ष निर्माणको दिशामा सिङ्गो पार्टीलाई हाँक्नुपर्ने आवश्यकता छ।’

पार्टी केन्द्रीय कमिटीका सदस्यहरूलाई उनीहरूको योग्यता र क्षमताका आधारमा जिम्मेवारी दिँदै सिङ्गो पार्टीलाई एकताबद्ध बनाएर अघि बढ्नुपर्ने आजको आवश्यकता भएको बताउनु भयो। ‘स्थायी कमिटीले गर्नुपर्ने त्यही नै हो । तर के भएको वा गरिएको छ । मैले बुझ्न पाएको छैन। बुझेर मात्र धेरै कुरा भन्न उपयुक्त हुनेछ। कार्य विभाजन हेरे मलाई कयौँ कुरा चित्त बुझेन’ नेता खनालले भन्नुभएको छ, ‘अब अपानी हेर्छु। अनि आफ्नो कुरा भनौला। पोलिटब्युरो र केन्द्रीय कमिटी बैठक हुन बाँकी नै छ नि।’