पोखरा-भौतिक पूर्वाधार तथा यातायात मन्त्री देवेन्द्र दाहालले सरकारको मर्म झल्कने गरी काम गर्न कर्मचारीहरुलाई निर्देशन दिनुभएको छ। सडक विभाग मार्फत पोखरामा आयोजना गरिएको आयोजना सञ्चालन तथा व्यवस्थापन सम्वन्धि दुई दिने कार्यशालाको समापनका अवसरमा निर्देशनात्मक मन्तव्य दिँदै उहाँले विकास निर्माणलाई तिव्रता दिई आर्थिक समृद्धीको लक्ष्य हाँसिल गर्नु पर्ने भएकाले सोहि ढंगबाट काम गर्न उहाँले निर्देशन दिनु भएको हो।

रुग्ण आयोजनाहरुको व्यवस्थापन गर्दै नयाँ आयोजनाहरुलाई गति दिने गरी कार्यक्षेत्रमा खटिन मन्त्री दाहालको आग्रह छ। असल नियतले कार्यसम्पादन गर्दा कुनै पनि निकायबाट कार्वाहीमा परिन्छ कि भन्ने डर नमानी कार्य गर्न भन्दै मन्त्री दाहालले नीतिगत समस्याहरु भए मन्त्रालयले सहजीकरण गर्ने समेत उहाँले प्रतिवद्धता जनाउनुभयो।

नेपाल अझै पनि निर्माणकै चरणमा रहेकाले अब बन्ने र बनि रहेका संरचनाहरुलाई दिगो र सुरक्षित बनाउने तर्फ ध्यान दिन समेत उहाँको आग्रह छ। आयोजनाहरुलाई आवश्यकता र उपयोगीताका आधारमा प्राथमिकता दिईनु पर्ने भन्दै मन्त्री दाहालले संख्यात्मक रुपमा मात्र नभई गुणात्मक रुपमा निर्माण कार्यमा जोड दिनु पर्ने बताउनुभयो। कुनै पनि आयोजना लामो समय सम्म अलपत्र रहने अवस्थाको अन्त्य गर्न भन्दै उहाँले योजना, आयोजना अलपत्र पारिने प्रवृतिको अन्त्य गर्न मन्त्रालयले प्राथमिकता दिएको उल्लेख गर्नु भयो।

कार्यक्रममा मन्त्रालयका सचिव केशवकुमार शर्माले प्रत्येक आयोजनाहरुको विवरण चुस्त राख्न, अभिलेख प्रणालीलाई व्यवस्थित बनाउन तथा कार्यक्षेत्रमानै रहेर काम गर्न कार्यालय प्रमुख तथा आयोजना प्रमुखहरुलाई निर्देशन दिनुभयो। कार्यसम्पादनका क्रममा बेरुजु फस्र्यौटलाई समेत ध्यान दिँदै बेरुजू नहुने ढंगबाट काम गर्न आग्रह गर्नुभयो।

कार्यशालामा सडक विभागका महानिर्देशक रामहरी पोखरेल, उपमहानिर्देशक उमेशविन्दू श्रेष्ठ, मन्त्रालयका सहसचिव चन्द्रकला पौडेल, कृष्णराज पन्त, प्रभातकुमार झा लगायतले विभिन्न विषयमा अवधारणा पत्रहरु पेश गर्नु भएको थियो। कर्मचारीहरुको कार्यसम्पादनलाई थप गतिशिल बनाउन देशका अन्य भागमा समेत यस प्रकारको कार्यशाला सञ्चालन गरिने सडक विभागका महानिर्देशक पोखरेलले जानकारी दिनुभएको छ।

१७ बुँदे प्रतिवद्धता तथा निर्देशन
१७ बुँदे प्रतिवद्धता तथा निर्देशन जारी गर्दै कार्यशाला समापन भएको छ। बढी भन्दा बढी समय कार्यक्षेत्रमा खटिन, अभिलेख प्रणाली व्यवस्थित बनाउन, कार्यसम्पादन विवरण नियमित रुपमा सडक विभागमा पठाउन लगायत विषयहरु त्यसमा समेटिएको छ। रुग्ण आयोजना व्यवस्थापनको कामलाई गति दिन, सञ्चालित आयोजनाहरुको नियमित नियमन गर्न लगायतका विषयहरु समेत त्यसमा रहेका छन्।

उक्त १७ बुँदे प्रतिवद्धता तथा निर्देशनको प्रभावकारी कार्यान्वयन गर्न समेत मन्त्री दाहालले आग्रह गर्नु भयो। उल्लेखित विषयहरु कार्यान्वयन भए, नभएको मूल्यांकन मन्त्रालयले गर्ने र त्यसलाई दण्ड र पुरस्कार प्रदानको आधार समेत बनाईने मन्त्रालयका सचिव शर्माले बताउनु भएको छ।