काठमाडौँ-नेपाली कांग्रेसका सभापति शेरबहादुर देउवाले कांग्रेस-एमालेबीच भएको गठबन्धनमा कुनै समस्या नभएको बताउनुभएको छ।

आफ्नै निवासमा दलबाट प्रतिनिधित्व गरेर सरकारमा गएका मन्त्रीहरूको ब्रिफिङ सुनेपछि सभापति देउवाले ७ बुँदे सहमति सफल बनाउने गरी काम गर्न निर्देशन दिनुभएको छ।

बैठकमा सहभागी गृहमन्त्री रमेश लेखकका अनुसार सभापति देउवाले सबै मन्त्रीहरूको कुरा सुनेपछि यस्तो बताउनुभयो। उहाँले भन्नुभयो, ‘सभापतिज्यूले पनि कांग्रेस एमाले सहमति अनुसार अघि बढ्ने हो। यसै विषयमा केन्द्रित भएर काम गर्नु भन्नुभयो ।

बैठकमा हामी दुई दल मिलेर सरकार बनेको र गठबन्धनमा कुनै समस्या तथा बाधा अप्ठ्यारा नभएको भन्दै छलफल भएको उहाँले बताउनु भयो। ‘हामीबीच भएका ७ बुँदे सहमति अनुसार यो समीकरणलाई अघि लाने गरेर काम गर्ने तथा सेवा प्रवाहको क्षेत्रमा नागरिकलाई बढी भन्दा बढी सेवा प्रवाह गर्ने र मुलुकमा आर्थिक समृद्धि र सुशासन कायम गर्ने विषयमा छलफल भएको छ।