काठमाडौं-नेकपा एमालेका महासचिव शंकर पोखरेलले संघीयता र संविधान कार्यान्वयनको लागि आवश्यक पर्ने कानुनहरू वर्तमान सरकारले बनाएर अघि बढ्ने बताउनु भएको छ।  

शिक्षकहरूको माग सम्बोधनको लागि दबाब दिन नेपाल शिक्षक महासङ्घले नेकपा एमाले केन्द्रीय कार्यालयमा बुधबार आयोजना गरेको धर्ना बस्न गएका शिक्षकहरूलाई सम्बोधन गर्दै महासचिव पोखरेलले यसकै लागि देशका दुई प्रमुख पार्टी मिलेर सरकार बनाएको बताउनुभयो। यसलाई तदारुकता साथ अघि बढाउने गरी सरकार लागेको महासचिव पोखरेलले प्रष्ट पार्नुभयो। 

‘राज्यले शिक्षकहरूको मागलाई ध्यानमा राखेर, संविधानको भावनालाई आत्मासाथ गर्दै शिक्षा ऐन जारी गर्छ, यो विषयलाई यही सदनमा टुङ्ग्याउन पाए हुन्थ्यो भनेर हामी आफैँ लागि रहेका छौँ’, महासचिव पोखरेलले भन्नुभयो। 

ऐनमा समेट्ने विषयमा एक मत बनाउनको लागि सबैको प्रयास आवश्यक पर्ने महासचिव पोखरेलले बताउनुभयो। कुन-कुन विषयमा कसरी जाने भन्ने विषयमा एक्यमतता बनाउने कुरा धर्ना भन्दा महत्त्वपूर्ण हुने उहाँले स्पष्ट पार्नुभयो। ‘तपाईँहरूको साथमा हामी छौँ, चिन्ता गर्नुपर्ने स्थिति छैन’, महासचिव पोखरेलले भन्नुभयो। 

शिक्षकहरूको नेतृत्वमा बस्ने नेताहरूले आफ्ना विद्यालय राम्रो बनाउन लाग्नु पर्ने पनि महासचिव पोखरेलले बताउनुभयो। ‘नेताहरूले जिम्मा लिएका विद्यालय राम्रा बनाउनु पर्छ, यसबाट अरूले पनि पाठ सिक्छन्’, महासचिव पोखरेलले भन्नुभयो। 

नेपालमा राजनीति भित्र राजनीति प्रवेश गराउने प्रयत्न हुने गरेका भन्दै महासचिव पोखरेलले राजनीतिमा राजनीति प्रवेश गर्न दिनु नहुने बताउनुभयो। नेपालमा राजनीति दलले शिक्षामा समस्या ल्याए भन्ने गलत कुरा भइरहेको बताउँदै महासचिव पोखरेलले अहिले शिक्षा क्षेत्रमा भएको विकास राजनीतिको योगदान हो भन्ने कुरा बिर्सन नहुने बताउनुभयो। 

महासचिव पोखरेलले परम्परागत शिक्षा प्रणालीलाई उद्यमशीलता र जीवन जिउने शिक्षामा परिवर्तन गराउनु पर्ने पनि बताउनुभयो। नेपालको शिक्षाले अब सिपयुक्त र व्यवहारिक जनशक्ति उत्पादन गर्नुपर्ने उहाँले धारणा राख्नु भयो। शिक्षाले नागरिक कर्तव्य सहितको जनशक्ति उत्पादन गर्नुपर्नेमा उहाँले जोड दिनुभयो।