काठमाडौं-काठमाडौंमा बालिकालाई यौन पेसामा लगाएको आरोपमा होटल सञ्चालकलाई प्रहरीले पक्राउ गरेको छ।

काठमाडौँ महानगरपालिका-१६ बालाजुस्थित पञ्चेश्वर महाकाली गेस्ट हाउस एन्ड रेस्टुरेन्टका सञ्चालक गोरखाको पालुङटार नगरपालिका-६ घर भएका शम्भुलाल मल्ललाई प्रहरीले पक्राउ गरेको हो। 

गेस्ट सञ्चालकले आर्थिक लाभ र फाइदा लिई बालिकाहरूलाई जबर्जस्ती वेश्यावृत्तिमा लगाउने गरेको प्रहरीको दाबी छ। 

गोप्य सूचनाका आधारमा उनलाई पक्राउ गरेको मानव बेचविखन ब्युरोले जनाएको छ। 

उक्त गेस्टहाउसबाट २ जना बालिकाको पनि उद्धार गरी सुरक्षित आवासका लागि सेल्टर होममा पठाइएको छ। 

पक्राउ परेका मल्लविरुद्ध मानव बेचबिखन तथा ओसोर पसारको कसुरमा काठमाडौं जिल्ला अदालतबाट ५ दिनको म्याद लिएर अनुसन्धान अघि बढाइएको छ ।