अपिल मिडिया प्रा. लि.
सूचना विभागमा दर्ता नं. : २४८२/२०७७–०७८
Office: Kathmandu Metropolitan City- 29
Phone: +९७७-९८५११०७८२४
News: yobelanews@gmail.co

म्याग्दीमा ट्याक्टर दुर्घटना हुँदा २ युवकको मृत्यु, ४ घाइते

म्याग्दीमा ट्याक्टर दुर्घटना हुँदा २ युवकको मृत्यु, ४ घाइते


म्याग्दी-म्याग्दीमा ट्याक्टर दुर्घटना हुँदा दुई युवकको मृत्यु भएको छ भने चार जना घाइते भएका छन् । बिहीबार साँझ धवलागिरि गाउँपालिका-२ लुलाङमा ग १ त ७१९६ नम्बरको ट्याक्टर पल्टिँदा दुई जनाको मृत्यु भएको जिल्ला प्रहरी कार्यालय म्याग्दीले जनाएको छ।

दुर्घटनामा स्थानीय १८ वर्षीय देविन विक र २१ वर्षीय पूर्णलाल रसाइलीको मृत्यु भएको जिल्ला प्रहरी कार्यालय म्याग्दीका प्रहरी निरीक्षक सागर पौडेलले जानकारी दिनुभयो । दुर्घटनामा पूर्णलालको घटनास्थलमै मृत्यु भएको हो । देविनको भने लुलाङ स्वास्थ्य चौकीमा उपचारको क्रममा मृत्यु भएको प्रहरीले जनाएको छ।

दुर्घटनामा सोही ठाउँका कविराज विक र कमल विक, म्याग्दीकै मालिका गाउँपालिका–६ दरबाङका विकास विक र धवलागिरि गाउँपालिका–४ का किस्मत विक घाइते भएका छन्। 

उनीहरु सबैलाई लुलाङ स्वास्थ्य चौकीमा सामान्य उपचारपछि थप उपचारको लागि राति नै सदरमुकाम बेनी लगिएको थियो । त्यसमध्ये गम्भीर अवस्थाका एक घाइतेलाई पोखराको मणिपाल अस्पताल लगिएको प्रहरीले जनाएको छ । ट्याक्टर सडकबाट करिब डेढ सय मिटर तल खसेर दुर्घटना भएको हो ।