विराटनगर-नेकपा एमाले स्थायी कमिटी सदस्य एवं प्रेस चौतारी नेपालका इञ्चार्ज राजेन्द्र गौतमले सपना समृद्धिको आरम्भ भएको बताउनुभएको छ।

आइतबार विराटनगरमा प्रेस चौतारी नेपालको १०औँ केन्द्रीय महाधिवेशनको उद्घाटन कार्यक्रमलाई सम्बोधन गर्दै गौतमले प्रधानमन्त्री केपी शर्मा ओली समृद्ध नेपाल सुखी नेपालीको सपना देख्ने नेता भएको बताउनुभयो। ‘नेतृत्व व्यक्तिको इच्छाले मात्र हुन्न आवश्यकताले स्थापित गराउँछ’, उहाँले भन्नुभयो।

गौतमले संगठनमा अनुशासन जरुरी रहेको बताउनुभयो। अनुशासनमा नरहने कार्यकर्ताले संगठन चलाउन नसक्ने उहाँले स्पष्ट पार्नुभयो। प्रेस चौतारी नेपाललाई परिणाम दिन सक्ने नेतृत्व आवश्यक रहेको उहाँले बताउनुभयो । कसलाई कहाँ खटाउँदा राम्रो काम गर्छ भन्ने हेरेर नै जिम्मेवारी दिइने गौतमको भनाइ छ।

पत्रकारले पस्किने विषयले लोकतन्त्रलाई बलियो बनाउन कति सहयोग गरेको छ भन्ने कुरा हेर्नुपर्नेमा उहाँले जोड दिनुभयो । अहिले सामाजिक सञ्जाल पढिनक्नुको अवस्थामा रहेको गौतमले सुनाउनुभयो । ‘सामाजिक सञ्जालले नागरिकको स्वतन्त्र रूपमा बाँच्न पाउने अधिकार नै खोसेको छ’, उहाँले भन्नुभयो ।

सामाजिक सञ्जालले ज्युदाे मानिसको मृत्यु भएको भन्ने सम्मका भ्रामक सूचना प्रवाह गरिरहेका उहाँले बताउनुभयो । यसलाई रोक्न आवश्यक रहेको गौतमले स्पष्ट पार्नुभयो । सामाजिक सञ्जाललाई नियन्त्रण होइन नियमन गर्न अति आवश्यक रहेको उहाँले बताउनुभयो ।

अहिले नेकपा एमाले र देश गम्भीर संकटमा रहेको बताउँदै उहाँले यसलाई जोगाउन सबै एकताबद्ध हुनुपर्नेमा जोड दिनुभयो । त्यसैले प्रेस चौतारी नेपालले एकताबद्ध भएर सक्षम नेतृत्व छान्न पर्नेमा उहाँले जोड दिनुभयो ।