काठमाडौं- नेकपा एमालेका सचिव एवं सांसद योगेश भट्टराईले नेकपा माओवादी केन्द्र संविधानको रक्षा गर्ने पक्षमा हो कि विपक्षमा भनेर प्रश्न गर्नुभएको छ।

संसदमा विपक्षी दलले उठाएका विषय लगायत पछिल्ला विकसित घटनाक्रमका बारेमा प्रधानमन्त्री केपी शर्मा ओलीले संसदमा बोल्ने जानकारी दिदादिदै पनि संसद बैठक अबरोध गरेको भन्दै सचिव भट्टराईले माओवादीलाई सामाजिक सञ्जाल फेसबुक मार्फत् यस्तो प्रश्न गर्नुभएको हो। 

‘आज समय सीमाका रूपमा राष्ट्रिय सभाबाट प्रतिस्थापन विधेयक पारित हुनै पर्ने बाध्यात्मक अवस्था छ। यसलाई रोकेर माओवादी पार्टीले संविधान र कानून बिहीनताको अवस्था सिर्जना गर्न खोजको हो ? माओवादी पार्टी यो संविधानको रक्षा गर्ने पक्षमा छ की छैन ?’, आइतबारको राष्ट्रियसभा बैठक रोकिएपछि भट्टराईले सामाजिक सञ्जालमा लेख्नुभएको छ। 

‘चैत्र १५ गते भएको हिंसात्मक घटनाका दोषीहरूलाई करवाहीको दायरामा ल्याउन र लोकतान्त्रिक गणतन्त्रको पक्षमा संसदमार्फत् राष्ट्रिय एकता र ऐक्यबद्धता प्रकट गर्नुपर्ने दायित्वप्रति माओवादी पार्टी किन अबरोधक बनेको हो ?’, प्रश्न गर्दै भट्टराईले भन्नुभएको छ, ‘संविधानको धारा १०५ ले कुनै पनि अदालतमा विचाराधीन विषयमा संसदमा छलफल गर्न मिल्दैन भन्ने स्पष्ट छ। संविधानको पक्षधर भनिएको माओवादी नेतृत्वले यो कुरा किन नबूझेको ?’

सचिव भट्टराईले दक्षिणपन्थी अतिवादी, ब्यवस्था र संविधान विरोधी, हिंसावादी, जातीय, साम्प्रदायिक एकता विरोधी, समग्रमा राष्ट्र र जनता विरोधी कुनैपनि हर्कतलाई परस्त गर्नु लोकतान्त्रिक गणतन्त्र पक्षधर शक्तिहरूको साझा कार्यभार रहेको स्मरण गराउनु भएको छ। ‘बिशेषगरि राष्ट्रियसभाका सम्माननीय अध्यक्षको गम्भीर ध्यानाकर्षण गर्दछु’, सचिव भट्टराईले भन्नभएको छ।