काठमाडौं-काठमाडौंको व्यस्त सडक र नदी किनारमा कष्टकर जीवन बिताउने एक पात्रको हृदयस्पर्शी कथा बोकेको लघु चलचित्र ‘बोतल’ सार्वजनिक भएको छ।

निर्देशक दिवश नेपालको लेखन तथा निर्देशनमा बनेको यस सामाजिक चलचित्रमा समाजको नजरबाट ओझेल परेका व्यक्तिहरूको दैनिकीलाई नजिकबाट प्रस्तुत गरिएको छ। उनीहरूले भोगेका तिरस्कार र अपमानलाई चलचित्रले प्रतिबिम्बित गरेको छ। निर्देशक नेपालका अनुसार, चलचित्रले दर्शकलाई अन्यायको सामना गर्न सक्ने चेतनशील समाज निर्माण गर्न प्रेरित गर्ने प्रयास गरेको छ।

निर्देशक नेपालले भन्नुभयो, ‘हामीले यो चलचित्रमार्फत समाजमा व्याप्त दमन र बेसहारापनको मुद्दालाई उजागर गर्ने प्रयास गरेका छौं। एउटा सानो बोतल जस्तै, यी मानिसहरूको जीवन पनि समाजका लागि अर्थहीन जस्तो लाग्न सक्छ, तर उनीहरूभित्र पनि मानवीय भावना, संवेदना र अस्तित्वको बोध छ।’

चलचित्रमा नविन लुहागुन, दिपेश नेपाल, अनुज बिष्ट, सबिन रसाइली, गौरव आचार्य, दानियल शेर्पा, मदन बस्नेत लगायतका कलाकारहरूको जीवन्त अभिनय रहेको छ। टिकाराम आचार्यको छायांकन तथा सम्पादनमा तयार भएको लघु चलचित्र ‘बोतल’ थ्री इन्टरटेन्टमेन्ट युट्युब च्यानलमार्फत प्रदर्शन भएको छ।