काठमाडौं-काठमाडौं महानगरपालिका उप-प्रमुख सुनिता डङ्गोलले नेपाली युवा सकारात्मक ऊर्जा र राष्ट्रिय भावनाले ओतप्रोत भएका बताउनुभएको छ।

लोकतन्त्र दिवसको अवसरमा आज भृकुटीमण्डपमा नेकपा एमालले आयोजना गरेको यूथ सेलिब्रेसन कार्यक्रममा बोल्दै उप-प्रमुख डङ्गोलले नेपाली युवा सबैभन्दा माथि राष्ट्र भनेर एकजुट भएका बताउनुभयो। ‘जब जब युवा एकजुट हुन्छन् तब तब असम्भव भनिएका कुरालाई सम्भव बनाउँछन्, सफलता उनीहरूले नै पाउँछन्, जसले कहिल्यै हार मान्दैन’, उप-प्रमुख डङ्गोलले भन्नु भन्नुभयो।

अहिले एमाले माथि चौतर्फी आक्रमण भइरहेको बताउँदै उप-प्रमुख डङ्गोलले जति आक्रमण भए पनि विचलित नहुने दाबी गर्नुभयो। आफूले गरेको राम्रो काम देख्न नसक्नेहरूले आफू माथि निरन्तर आक्रमण गरिरहेका उहाँले बताउनुभयो। ‘विकासका काम गर्ने माथि आक्रमण गर्नेहरू राष्ट्र विरोधी तत्त्वहरू हुन्’,उप-प्रमुख डङ्गोलले भन्नुभयो।

नेपाली युवाले काम गर्न सक्छ भन्ने कुरा आफूले विश्व सामु प्रस्तुत गरेको उहाँले दाबी गर्नुभयो। आफूले गरेको कामले धेरैलाई पोलेको र उनीहरू आफू माथि निरन्तर आक्रमणमा लागि रहेका उहाँले स्पष्ट पार्नुभयो। ‘म रोकिन्न, म रोकिने मान्छे होइन, म मेरो सहर र मेरो देशको लागि काम गरिरहन्छु’, उहाँले भन्नुभयो।

एमाले अध्यक्ष केपी ओली पनि राष्ट्रवादी र काम गर्ने मान्छे भएको कारण उहाँमाथि आक्रमण भइरहेको उहाँले बताउनुभयो । भूकम्पले थिलथिलो भएको देशलाई उठाउने केपी ओलीलाई सम्मान गर्नुको बदला राष्ट्र विरोधीहरूले विभिन्न आरोप लगाउने गरेको उहाँको भनाइ छ।

युवाले सही र गलत छुट्याउनु पर्ने उहाँले बताउनुभयो। युवाले हरेक कुरालाई रचनात्मक हिसाबले विश्लेषण गर्नुपर्ने बताउनुभयो। सत्य के हो भनेर हेर्ने र खोज्ने मानिस मात्र युवा हुने उहाँको धारणा छ। मानिस उमेरले मात्र युवा हुने होइन सोच र कामले युवा हुने बताउनुभयो।

एमालेले कसैको घर लुट्न नसिकाउने उहाँले बताउनुभयो। सामाजिक सञ्जालमा भाँडभैलो मच्चाउन नसिकाउने उहाँले प्रष्ट पार्नुभयो । ‘एमालेले युवालाई दश नङ्ग्रा खियाउन सिकाउँछ, त्यस कारण म एमालेमा छु’, डङ्गोलले भन्नुभयो।

जसले सपना देख्छ उसैले काम गर्ने पनि उहाँले बताउनुभयो। एमाले सपना देख्ने पार्टी भएको उहाँको धारणा छ। ‘स्टन्ट गरेर देश बन्दैन, अरूलाई गाली गरेर देश बन्दैन, देश बनाउने हो भने योजना अनुरूप काम गर्नुपर्छ, योजना बनाउनु पर्छ’, उहाँले भन्नुभयो।

नेकपा एमालेका युवाहरू समस्याबाट भाग्ने युवा नभएका उहाँले बताउनुभयो। समस्यासँग जुधेर समाधान खोज्नुपर्ने उहाँको धारणा छ।