काठमाडौं-प्रधानमन्त्री एवं नेकपा एमालेका अध्यक्ष केपी शर्मा ओलीले मिसन २०८४ मा बहुमत ल्याउन जनसंगठनहरुले सक्रियता बढाउनु पर्ने बताउनु भएको छ। समय सापेक्ष रुपमा संगठनलाई अघि नबढाएसम्म उपलब्धी हासिल नहुने प्रधानमन्त्री ओलीको धारणा छ।

गत फागुन देखि वैशाखसम्म महाधिवेशन गरेका जनसंगठनका पदाधिकारीहरुलाई संयुक्त रुपमा बधाइ दिन आयोजना गरिएको कार्यक्रममा बोल्दै प्रधानमन्त्री ओलीले संगठन भित्र गुटबन्दी र बेठिक प्रवृतिलाई प्रोत्साहन गर्न नहुने बताउनु भएको छ।

प्रतिकुल अवस्थामा एमालेले सरकारको नेतृत्व गर्नु परेको स्मरण गर्दै प्रधानमन्त्री ओलीले चारैतिरबाट सरकार पार्टीका विरुद्ध भइरहेका हमलाको प्रतिवाद गर्न जनसंगठन क्रियाशिल हुनुपर्ने बताउनुभएको छ।

एमाले र नेतृत्वका विरुद्ध सञ्चालित सम्पूर्ण अफवाहलाई आफ्नो लोकतन्त्रप्रतिको निष्ठाले नै जवाफ दिइरहेको प्रधानमन्त्री ओलीले बताउनुभयो। ‘५५ वर्ष अघि विभिन्न विचार समुहलाई एकगठ बनाएर एमालेको जग बसाइएको हो। अहिले एमाले फैलिएर जहाँ नेपाली त्यहाँ एमाले भन्ने अवश्थामा पुगेको छ ’ प्रधानमन्त्री ओलीले भन्नुभयो, ‘हाम्रो लोकतन्त्रप्रतिको निष्ठामा कसैले प्रश्न नगरे हुन्छ।’ जनसंगठन सक्रिय रुपमा लागेमा देश एमालेमय हुन धेरै समय नलाग्ने प्रधानमन्त्री ओलीको भनाइ छ।

कुनै बेला जनसंगठनहरुलाई पिरामिड आकारमा बनाउने कि नबनाउने भन्ने विषयमा पार्टीभित्रै संघर्ष गर्नु परेको स्मरण गर्दै प्रधानमन्त्री ओलीले जनसंगठन अहिले एमालेका कार्यकर्ता उत्पादन गर्ने कारखानाका रुपमा रहेको बताउनुभयो । प्रधानमन्त्री ओलीले जनसंगठनहरु प्रायोजित हैन, प्रयोजन सहितका बनाउन निर्देशन दिनुभएको छ। ‘तपाईंहरु बिचारमा प्रतिवद्ध र अनुशासनमा कठोर बन्नुहोस’ प्रधानमन्त्री ओलीले भन्नुभयो, ‘कार्यकर्तालाई हप्काउने,थर्काउने र रुखो बचन बोल्ने काम नगर्नुहोस। यस्तो व्यवहारबाट संगठनप्रति नयाँ मानिसको आकर्षण बढ्दैन। तपाईंहरुले साथी बनाउने,साथी बढाउने र साथी कायम राख्ने काम गर्नुहोस् ।’

प्रधानमन्त्री ओलीले सामाजिक सञ्जालमा पिपिरीका बाजा बजाउनेले फैलाएका भ्रम चिर्न पनि जनसंगठनलाई सक्रिय भएर लाग्न निर्देशन दिनुभएको छ। ‘सामाजिक सञ्जालमा ताल र सुरु बिनाका पिपिरी बाजा बजाउनेहरुलाई जवाफ दिनुहोस्’ प्रधानमन्त्री ओलीले भन्नुभयो ‘जनसंगठनको यति ठुलो पंक्ती एक पटक सक्रिय हुने हो भने विरोधीहरु आफैं हराउछन्।’

हिजो साँझ बालुवाटारमा भएको कार्यक्रमको सञ्चालन पार्टी जनसंगठन समन्वयका प्रमुख भानुभक्त ढकालले गर्नु भएको थियो । कार्यक्रममा १० वटै जनसंगठनका इन्चार्ज र निवर्तमान अध्यक्षको पनि उपस्थिती रहेको थियो ।