खोटाङ-नेकपा एमालेको दोस्रो विधान महाधिवेशनका लागि केन्द्रीय कमिटीले सर्वसम्मत रूपमा पारित गरेको अन्तर पार्टी निर्देशन अपानी १२ को निर्णयलाई एमाले खोटाङले पूर्ण रूपमा समर्थन गर्ने निर्णय गरेको छ।

आगामी भदौ २० गतेदेखि २२ गतेसम्म एमालेको दोस्रो विधान महाधिवेशन हुँदै छ। त्यसका लागि एमालेले भदौ ५, ६ र ७ गते पालिका स्तरीय र भदौ ८ गते जिल्ला स्तरीय सुझाव सङ्कलन कार्यक्रम तथा सचिवालय बैठक आयोजना गरेको थियो।

विधान संशोधन प्रस्ताव माथिको छलफल तथा सचिवालयको बैठकको क्रममा एमालेका बहुसङ्ख्यक नेता तथा कार्यकर्ताहरूले राष्ट्रपति पद नेपालको सन्दर्भमा गणतन्त्रको प्रतीक भएकाले पूर्व राष्ट्रपति विद्यादेवी भण्डारी दलीय राजनीतिमा फर्कन नहुने सुझावहरू पेस गरेका थिए। भदौ ९ गते हलेसीको दिक्तेलमा आयोजित पत्रकार सम्मेलनमा नेकपा एमाले खोटाङका अध्यक्ष देवविक्रम राईले केन्द्रीय कमिटीले पठाएको ‘अपानि-१२’लाई उपयुक्त ठहर गर्दै पूर्व राष्ट्रपति विद्यादेवी भण्डारीलाई सक्रिय राजनीतिमा फर्कन नहुने सुझाव दिने निर्णय जिल्ला कमिटी खोटाङले गरेको बताउनुभएको छ।

प्रधानमन्त्री केपी शर्मा ओली विरुद्ध व्यापक आक्रमण र घेराबन्दी गर्ने प्रयत्न गरिएकाले उक्त आक्रमणलाई निस्तेज गर्न नेतृत्वको रक्षा गर्नु नेता तथा कार्यकर्ताको दायित्व भएको विज्ञप्तिमा उल्लेख गरेको छ।

त्यस्तै, एमाले खोटाङको पूर्ण बैठकले वामपन्थी विचारका व्यक्ति तथा विगतमा पार्टी छाडेर गएका व्यक्तिलाई पुनः एमालेमा समाहित गर्ने अभियान सञ्चालन गर्ने निर्णय गरेको छ । जिल्लाका दश वटै स्थानीय तहमा अभियान सञ्चालनका लागि जिल्ला अध्यक्ष देवविक्रम राईलाई जिम्मेवारी प्रदान गरिएको एमाले खोटाङले जनाएको छ।

बैठकले पार्टीको कोशी प्रदेश कार्यसमितिले सुरु गरेको प्रदेशस्तरीय समृद्धिको खाका निर्माण अभियानलाई जिल्लाका तल्लो तहसम्म पु¥याउने निर्णय गरेको छ। यसका लागि प्रदेशसभा क्षेत्र नं. १ (क)मा उपसचिव कविता राई र २ (ख)का लागि राजन बञ्जरालाई जिम्मेवारी प्रदान गरिएको विज्ञप्तिमा उल्लेख गरिएको छ।

पार्टी जिल्ला कार्यसमितिको वार्षिक कार्ययोजना निर्माण र मातहतका समितिलाई आफ्नो वार्षिक कार्ययोजना निर्माण गर्न सहजीकरणका लागि सचिव सुरेन्द्रकुमार राईलाई जिम्मेवारी प्रदान गरिएको  विज्ञाप्तीमा उल्लेख गरिएको छ।

पत्रकार सम्मेलनमा पत्रकारहरुसँग कुराकानी गर्दै एमालेका पोलिटव्यूरो सदस्य विशाल भट्टराईले पूर्वराष्ट्रपति विद्यादेवी भण्डारीलाई देशको नेता बनाउन एमालेको सक्रिय राजनीतिमा रोक लगाइएको बताउनुभएको छ।

सचिवालय, पोलिटब्यूरो तथा केन्द्रीय समितिका बहुमत सदस्यले गरेको निर्णय पूर्वराष्ट्रपति भण्डारीको हितमा रहेको भट्राईले दावी गर्नुभएको छ। विद्यादेवी भण्डारी दुई पटक राष्ट्र प्रमुख भएको सम्मानित व्यक्ति हुनुहुन्छ। उहाँ पुनः सक्रिय राजनीतिमा आउँदा त्यो पदको ओझ घट्छ भन्ने पार्टीको निष्र्कष हो। एमालेले गरेको निर्णयले विद्यादेवी भण्डारीको हितमा रहेको दावी गर्नुभएको छ ।

सुझाव संकलन कार्यक्रममा विधान संशोधन प्रस्ताव प्रस्तुत तथा सुझाव सङ्कलन, केन्द्रीय कमिटी र प्रदेश कमिटीवाट जारी अन्तरपार्टी निर्देशन र परिपत्र, वार्षिक कार्ययोजना र अन्य विषयमा बृहत् छलफल भएको नेकपा एमाले खोटाङ जिल्ला प्रचार तथा प्रकाशन विभाग प्रमुख खेमराज राईले बताउनुभएको छ। छलफल पश्चात् विधान मस्यौदामा प्राप्त सुझावलाई लिखित रूपमा केन्द्रमा पठाइने प्रमुख राईले जानकारी दिनुभएको छ।