सुर्खेत-कर्णाली प्रदेशका मुख्यमन्त्री यामलाल कँडेलले सङ्घ, प्रदेश र स्थानीय तहबीचको सम्बन्ध जति सुदृढ हुन्छ, विकास र समृद्धिको गन्तव्यमा पुग्ने बाटो त्यति नै सहज हुने बताउनु भएको छ।

मुख्यमन्त्री कँडेलले तीनै तहबीचको सहकार्य र समन्वयलाई मजबुत बनाउन सके मात्रै सङ्घीयताको मर्म अनुसारको लक्ष्य पुरा हुने उल्लेख गर्नुभयाे। आज कर्णाली प्रदेश प्रशिक्षण प्रतिष्ठानको प्रशिक्षण परिषद्को तेस्रो बैठकलाई सम्बोधन गर्दै मुख्यमन्त्री कँडेलले सङ्घ र प्रदेशले नीति तथा योजना बनाउने भए पनि कार्यान्वयनको वास्तविक स्थान स्थानीय तह भएकाले समन्वयलाई प्राथमिकतामा राख्न आवश्यक रहेको उल्लेख गर्नुभयो।

सङ्घ र प्रदेशले गर्ने विकास कार्यको कार्यान्वयन क्षेत्र स्थानीय तह भएकोले स्थानीय सरकारलाई जिम्मेवार र सक्षम बनाउन आवश्यक रहेको मुख्यमन्त्री कडेलको भनाइ थियो। मुख्यमन्त्री कँडेलले प्रदेश सरकारले सुरु गरेको योजना बैकलाई स्थानीय तहले अनुसरण गर्नुपर्ने उल्लेख गर्नुभयो। विगतको अनुभवबाट सिक्दै, विगतको तजबिजीका आधारमा योजना छनोट गर्ने प्रवृत्तिलाई सुधार गर्दै जाने मुख्यमन्त्री कँडेलको भनाइ थियो । उहाँ भन्नुभयो, ‘हामीसँग भएको सीमित स्रोत र साधनलाई सही सदुपयोग गर्नु पर्छ।’

कर्मचारी प्रशासनतर्फ सङ्केत गर्दै मुख्यमन्त्री कँडेलले केवल समस्या देखाउने मात्र होइन, समस्याको समाधानका उपाय पनि खोज्ने प्रवृत्ति विकास गर्नुपर्नेमा जोड दिनुभयो। “समस्या देखाउन सजिलो हुन्छ, तर त्यसको समाधानका लागि व्यवहारिक उपाय सुझाउनु अझ महत्वपूर्ण हुन्छ।” उहाँले भन्नुभयो, विधि, थिति र कानुनको पालना गर्न सबैलाई कर्तव्य हो त्यसकारण विभेद नगरी काम गर्न आग्रह गरे। सङ्घीय व्यवस्थालाई प्रभावकारी बनाउन कानुनी स्पष्टता र प्रक्रियागत पारदर्शिता अनिवार्य हुने मुख्यमन्त्री कँडेलको भनाइ थियो।