ललितपुर-नेकपा (एमाले) दोस्रो विधान महाधिवेशन स्थल सनराइज सभा हलमा उद्घाटनको चहलपहल सुरु भइसकेको छ। गोदावरीको मूल सडकदेखि सभा हल छिर्ने प्रवेशद्वारबाट प्रवेश गर्ने प्रतिनिधि, पर्यवेक्षक, सर्वसाधारणलाई स्वयंसेवकहरूले व्यवस्थित गर्दै छन्। प्रतिनिधि, पर्यवेक्षक, सन्चाकर्मी र सर्वसाधारणको सवारी साधारणका लागि मूल सडक छेउमै पार्किङको व्यवस्था मिलाइएको छ।

स्वयंसेवक, प्राविधिकहरूको कार्ड स्क्यान कार्य सुरु भइसकेको छ। प्रतिनिधि, पर्यवेक्षकका लागि गेटभित्र छिर्ने प्रक्रिया खुला भइसकेको छैन। सञ्चारकर्मीहरूका लागि पर्खालसँगै जोडिएको मिडिया सेन्टर राखिएको छ।

हलभित्र स्थायी, पोलिटब्युरो, केन्द्रीय सदस्य, आयोगका प्रमुख र प्रतिनिधिहरूका लागि प्रदेश अनुसारको सिट व्यवस्थापन गरिएको छ। अहिले हलभित्र सरसफाइ, सिट व्यवस्थापन, डिजिटल, सुरक्षा प्रबन्ध, प्राविधिक पक्षको धमाधम परीक्षण भइरहेका छन्। हलभित्र उप महासचिव विष्णु रिमाल र मञ्च व्यवस्थापनका संयोजक पोलिटब्युरो सदस्य विनोद श्रेष्ठले नेतृत्व गरिरहनु भएको छ।

ठुलो डिजिटल बोर्ड अगाडि १८ पदाधिकारीका लागि कुर्ची व्यवस्थित गरिएको छ। दुवैतिर पार्टीको झन्डा र राष्ट्रिय झन्डाले मञ्च सजाइएको छ। मञ्चको दायाँ, बायाँ टुँडाल शैलीमा साना डिजिटल बोर्ड राखिएको छ। त्यसका साथै मञ्चको बायाँतिर पुष्पलाल, मनमोहन अधिकारी र मदन भण्डारीको तस्बिर राखिएको छ। दायाँतिर कार्ल मार्क्स, एङ्गेल्स र लेनिनको तस्बिर राखिएको छ। मञ्चको शिरमा ‘नेपाल कम्युनिस्ट पार्टी (एमाले) दोस्रो महाधिवेशन लेखिएको छ। त्यसमाथि सर्वोच्च शिखर सगरमाथाको प्रतीक राखिएको छ। सगरमाथा माथि पार्टीको लोगो सूर्यभित्र हँसिया हथौडा र नेपालको झन्डा राखिएको छ।

प्रत्यक्ष प्रसारणसहित बाहिर मिडिया सेन्टरमा डिजिटल बोर्ड राखिएको छ। हलको दायाँ–बायाँ झ्यालमा ‘जनताको बहुदलीय जनवाद जिन्दाबाद’को नारासहित दुई वटा ठूला डिजिटल बोर्ड राखिएको छ ।

‘निर्णायक राष्ट्रिय शक्ति निर्माण हाम्रो सङ्कल्प, समृद्ध नेपाल सुखी नेपाली राष्ट्रिय गन्तव्य’ मूल नारासहित सुरु हुने नेकपा (एमाले) दोस्रो विधान महाधिवेशन स्थल गोदावरी सनराइज सभाहलतिर अहिले सातदोबाटोबाट प्रतिनिधि, पर्यवेक्षक, पार्टी शुभचिन्तकहरु आउनेक्रम जारी छ।

दोस्रो विधान महाधिवेशनमा २ हजार २६ जना प्रतिनिधि र आयोजकका हैसियतमा ३१५ जना थप गरी कुल २३ सय ४१ जनाको सहभागी रहने छन्। स्वयं सेवक, सुरक्षा निकायसहित ३५ सय जनालाई खानाको व्यवस्था गरिएको छ।