काठमाडौँ-नेकपा एमालेका उपाध्यक्ष तथा निवर्तमान उपप्रधान तथा अर्थमन्त्री विष्णुप्रसाद पौडेलले संविधान दिवसको अवसरमा आत्मसमीक्षा गर्दै आफूबाट भएका गल्ती कमजोरीका लागि क्षमायाचना गर्नुभएकाे छ।

संविधान दिवसको अवसरमा शुक्रबार शुभकामना व्यक्त गर्दै उपाध्यक्ष पौडेलले व्यक्तिगत रूपमा आफूबाट भएका गल्ती, कमजोरी र भूलप्रति क्षमायाचना गर्नुभएकाे छ।

उपाध्यक्ष पौडेलले जनताको र विशेषगरी नयाँ पुस्ताको आकांक्षा, असन्तुष्टि र आक्रोशलाई बुझ्न र सम्बोधन गर्न नसक्नु, भ्रष्टाचार नियन्त्रण, सुशासन र सेवा प्रवाहमा अपेक्षित सुधार हुन नसक्नु जेन्जी आन्दोलनका मुख्य कारण भएको स्वीकार गर्नुभएकाे छ।

उपाध्यक्ष पौडेलले जेन्जी आन्दोलनका शहीदहरूलाई श्रद्धाञ्जली अर्पण गर्दै शोकसन्तप्त परिवारप्रति समवेदना प्रकट गरेका छन् भने घाइतेहरूको शीघ्र स्वास्थ्य लाभको कामना पनि गर्नुभएकाे छ।

उपाध्यक्ष पौडेलको सन्देश:

संविधान दिवसको शुभकामना

–जेन्जी आन्दोलनका शहीदहरूप्रति श्रद्धाञ्जली र शोकाकुल परिवारजन तथा आफन्तहरूमा समवेदना व्यक्त गर्दछु । घाइतेहरूको शीघ्र स्वास्थ्य लाभको कामना गर्दछु । 

–सम्माननीय प्रधानमन्त्री सुशीला कार्कीको नेतृत्वमा गठित मन्त्री परिषद्बाट शान्ति र अमन चैन कायम गर्ने, भ्रष्टाचार नियन्त्रण र सुशासन कायम गर्ने, जेन्जी आन्दोलनका क्रममा तोडफोड र आगजनी भएका सार्वजनिक र निजी क्षेत्रका संरचनाहरूको पुनर्निर्माण गर्ने र तोकिएको मितिमा प्रतिनिधि सभाको निर्वाचन गर्ने जस्ता महत्त्वपूर्ण अभिभारा पुराउन सकुन् भन्ने अपेक्षा गर्दछु । 

–जेन्जी आन्दोलनको क्रममा भएको हिंसा, हत्या, तोडफोड र आगजनीको निष्पक्ष छानबिन गर्न, दोषीहरूलाई कानुन बमोजिम कारबाही गर्न र क्षतिग्रस्त सार्वजनिक तथा निजी संरचनाहरूको यथाशीघ्र पुनर्निर्माण गर्न सरकारसँग माग गर्दछु । 

–जनताको, विशेषगरी युवा पुस्ताको आकाङ्क्षा, असन्तुष्टि र आक्रोशलाई बुझ्न र सम्बोधन गर्न नसक्नु र भ्रष्टाचार नियन्त्रण, सुशासन एवम् सेवाप्रवाहमा अपेक्षित सुधार हुन नसक्नु जेन्जी आन्दोलनका मुख्य कारणहरू हुन् । तर आन्दोलनका क्रममा भएको हत्या–हिंसा, तोडफोड र आगजनी पनि त्यत्तिकै निन्दनीय छ । 

–विगतमा नेकपा एमालेले लिएका निर्णय, गरेका काम र तिनको परिणामका सम्बन्धमा गम्भीर समीक्षा हुने नै छ । पार्टी र राजकीय जिम्मेवारी निर्वाह गर्ने क्रममा भएका आफ्नो हिस्साका गल्ती, कमजोरी र भूलहरूप्रति क्षमायाचना गर्दछु । 

–अब हाम्रो सामु जनतासंग, विशेषगरी नयाँ पुस्तासँग एकाकार भएको, नीति निर्माण र नेतृत्व निर्माणमा युवाशक्तिको निर्णायक योगदान रहेको गतिशील र परिवर्तनको संवाहक शक्तिको भूमिकामा पार्टीलाई स्थापित गर्ने जिम्मेवारी आएको छ । तदनुरुप पार्टीको सङ्गठन, कार्यशैली र आचरणमा परिवर्तन हुने विश्वास व्यक्त गर्दछु । 

–आज असौज ३ गते, संविधान दिवसको ऐतिहासिक दिन । विगतका अनुभवबाट शिक्षा लिँदै संविधानको रक्षा, प्रयोग र विकासका लागि सम्पूर्ण नेपालीले योगदान दिन सकौँ । आपसी सद्भाव र एकताका साथ विकास, समृद्धि र सामाजिक न्यायको दिशामा प्रभावकारी ढंगले अघि बढ्न सकौँ । सबैमा संविधान दिवसको उपलक्ष्यमा हार्दिक शुभकामना व्यक्त गर्दछु । 

विष्णुप्रसाद पौडेल

उपाध्यक्ष, केन्द्रीय कमिटी

नेकपा एमाले

असौज ३, २०८२