काठमाडौं-नेपाल कम्युनिष्ट पार्टी एमालेकी सचिव पद्मा अर्यालले पार्टीको ११ औँ महाधिवेशन अन्तर्गत अब निर्वाचन प्रक्रियातर्फ अघि बढ्नुपर्ने बताउनुभएकाे छ।

नेकपा एमालेको ११ औँ महाधिवेनको बन्दसत्रस्थलबाट सञ्चारकर्मीसँग कुरा गर्दै सचिव अर्यालले निर्वाचन प्रक्रियामा जानु अघि पार्टीको विधानलाई समयसापेक्ष रूपमा संशोधन गरिएको जानकारी दिनुभयाे।

सचिव अर्यालले भन्नुभयाे, ‘अब हामी निर्वाचन प्रक्रियामा अगाडि बढ्नुपर्ने हुन्छ। तसर्थ निर्वाचन प्रक्रियामा जानु भन्दा अगाडि हामीले विधान महाधिवेशनमा पार्टीको एउटा विधान पारित गर्यौ । विधान महाधिवेशन पछि मुलुकमा जुन खालको राजनैतिक परिस्थिती सिर्जना भयो। यो सबै परिस्थितीलाई हेक्का राख्दै आजको आवश्यकताका आधारमा हामीले विधान संशोधन गरेर केही थोरै संशोधन सहित कमिटि निर्माणसँग जोडिएका विषयलाई अगाडि बढाएका छाैं।’

विधान महाधिवेशनमार्फत पारित विधानपछि मुलुकमा विकसित राजनीतिक परिस्थितिलाई ध्यानमा राख्दै आवश्यकताअनुसार सीमित संशोधन गरिएको उहाँले स्पष्ट पार्नुभयाे।

उहाँका अनुसार संशोधित विधानअनुसार अब निर्माण हुने केन्द्रीय समितिमा ३०१ जना सदस्य रहनेछन् । तीमध्ये १९ जना पदाधिकारी रहने व्यवस्था गरिएको छ। पदाधिकारीमा १ जना अध्यक्ष, ५ जना उपाध्यक्ष, १ जना महासचिव, ३ जना उपमहासचिव तथा ९ जना सचिव रहने प्रस्ताव अगाडि बढाइएको उहाँले बताउनुभयाे।

पार्टीलाई थप व्यवस्थित र सुदृढ बनाउने उद्देश्यसहित समिति निर्माणसँग सम्बन्धित विषयहरू अगाडि बढाइएको सचिव अर्यालको भनाइ छ।