काठमाडौं-नेकपा एमालेका सचिव महेश बस्नेतले स्वतन्त्र राष्ट्र भेनेजुएलामाथि भएको अमेरिकी हस्तक्षेपलाई साम्राज्यवादी हस्तक्षेप भन्दै निन्दनीय भएको टिप्पणी गर्नुभएको छ। सचिव बस्नेतले कुनै पनि देशको सार्वभौमिकता शक्तिमा होइन, जनतामा निहित हुने स्पष्ट पार्नुभएको छ।

सचिव बस्नेतले भेनेजुएलामा भएको बाह्य हस्तक्षेपले अन्तर्राष्ट्रिय कानुन, स्वाधीनता र विश्वशान्तिको मर्ममाथि गम्भीर प्रश्न उठाएको बताउनुभयो । उहाँले विश्वशान्ति र राष्ट्रहरूको स्वाधीनताको पक्षमा अन्तर्राष्ट्रिय समुदाय एकताबद्ध भएर प्रतिरोधमा उत्रिनुपर्ने आवश्यकता औँल्याउनुभयो। ‘कुनै पनि राष्ट्रमाथि बल प्रयोग गरेर हस्तक्षेप गर्नु सभ्य समाजका लागि स्वीकार्य हुन सक्दैन,’ उहाँले भन्नुभयो, ‘यस्ता कदमले विश्व व्यवस्थालाई अझ अस्थिर बनाउने खतरा हुन्छ।’

सचिव बस्नेतले अन्तर्राष्ट्रिय सम्बन्धमा समानता, पारस्परिक सम्मान र सार्वभौमिक अधिकारको रक्षा अपरिहार्य भएको उल्लेख गर्दै विश्व समुदायलाई जिम्मेवार भूमिका निर्वाह गर्न आह्वान गर्नुभयो।