काठमाडौं-नेपाली कांग्रेस दोस्रो विशेष महाधिवेशनको बन्द सत्र २०८२ पुस २८ गते सोमबार बिहान ८ बजे सुरू हुने भएको छ।

काठमाडौंको भृकुटीमण्डपमा अहिले जारी उद्घाटन कार्यक्रममा यो जानकारी दिइएको हो। उद्घाटन सत्रमा नेताहरूको शुभकामना मन्तव्यको क्रम जारी छ। त्यसबीच ४९ प्रतिशतभन्दा बढी महाधिवेशन प्रतिनिधिले विशेष महाधिवेशनको पक्षमा आफ्नो नाम दर्ता गराइसकेका छन्।

महाधिवेशन प्रतिनिधिहरूको नाम दर्ता बिहान सवा ८ बजेबाट सुरू भएको हो। अहिलेसम्म ४९.३४ प्रतिशतले नाम दर्ता गराइसकेको कार्यक्रममा जानकारी दिइयो।

देशभरबाट कुल ४ हजार ७४३ जना महाधिवेशन प्रतिनिधि छन्। यसको ४९.३४ प्रतिशत भनेको २३४० हुन आउँछ। सात वटै प्रदेशका लागि छुट्टाछुट्टै डेस्क बनाएर दर्ता प्रक्रिया सञ्चालन गरिएको छ। कार्यक्रम स्थल भृकुटीमण्डप मूलगेट सँगैका स्टलहरूबाट नाम दर्ता धमाधम भइरहेको छ।

नाम दर्ता गर्न आउँदा परिचय खुल्ने कुनै कागजात, एक प्रति पासपोर्ट साइजको फोटो र दर्ता शुल्क एक हजार रूपैयाँ साथमा लिएर आउन अनुरोध गरिएको छ।

गत असोज २९ गते ५४.५८ प्रतिशत महाधिवेशन प्रतिनिधिले विशेष महाधिवेशन माग गरेका थिए। कांग्रेस विधानको १७ (२) अनुसार ४० प्रतिशत महाधिवेशन प्रतिनिधिले विशेष महाधिवेशन माग गरेको तीन महिनाभित्र विशेष महाधिवेशन आह्वान गर्नुपर्ने हुन्छ।