काठमाडौं-नेपाल कम्युनिष्ट पार्टी (एमाले)का सचिव तथा जनसंगठन समन्वय संयन्त्रका संयोजक भानुभक्त ढकाल र सचिव तथा बागमती प्रदेश इन्चार्ज महेश बस्नेतले २०८२ माघ ४ गते काठमाडौंमा आयोजना हुने प्रदर्शनलाई केन्द्रमा राखेर संगठन परिचालन गर्न संयुक्त निर्देशन दिनुभएको छ।

आज काठमाडौंमा सम्पन्न जनसंगठन समन्वय संयन्त्रको बैठकलाई सम्बोधन गर्दै उहाँहरूले माघ ४ गते बागमती प्रदेशको आयोजनामा काठमाडौंको भृकुटीमण्डपबाट सुरु हुने प्रदर्शनलाई भव्य र सन्देशमूलक रूपमा सफल बनाउन सबै संगठनहरूको अधिकतम सहभागिता सुनिश्चित गर्न आग्रह गर्नुभयो।

सचिव ढकालले सबै जनसंगठनहरूलाई योजनाबद्ध ढंगले परिचालन हुन निर्देशन दिनुभयो। त्यस्तै, सचिव बस्नेतले ‘फेरि सिंहदरबार जल्ने जस्ता अवस्था नआओस् भन्नेमा युवाहरूलाई सचेत र अनुशासित ढंगले परिचालन गरौं,’ भन्नुभयो।

माघ ४ गते बागमती प्रदेशको आयोजनामा भृकुटीमण्डपबाट सुरु हुने प्रदर्शन प्रज्ञा प्रतिष्ठान, कमलादीमा पुगेर समापन हुने जनाइएको छ।