दाङ-नेकपा (एमाले)का महासचिव शंकर पोखरेलले रवि लामिछानेको मुद्दा फिर्ताले कानुनी राज्यलाई कमजोर बनाउने बताउनुभएकाे छ।

प्रेस चौतारी दाङले घोराहीमा आयोजना गरेको पत्रकार भेटघाट तथा सम्मान कार्यक्रममा बोल्दै महासचिव पोखरेलले रवि लामिछानेसँग सम्बन्धित मुद्दा फिर्ता गर्ने निर्णय कानुनी राज्यको मर्मविपरीत भएको भन्दै सरकारलाई उक्त निर्णय तत्काल सच्याउन आग्रह गर्नुभयाे।

महासचिव पोखरेलले भदौ २३ र २४ गते भएका घटनाहरूलाई सामान्य आन्दोलनको रूपमा व्याख्या गर्न नमिल्ने बताउँदै त्यसको अन्तर्य अहिलेका निर्णयहरूले नै पुष्टि गरिरहेको दाबी गर्नुभयाे। ‘प्रहरी र अदालतजस्ता संवैधानिक निकायमाथि आक्रमण हुनु सामान्य विषय होइन’, महासचिव पोखरेलले भन्नुभयाे, ‘यस्ता गतिविधिलाई ढाकछोप गर्ने निर्णयले हिंसा र अराजकतालाई प्रोत्साहन गर्छ ।’

महासचिव पोखरेलले नयाँ शक्ति’को नाममा कानुनी राज्यलाई चुनौती दिन नहुने उल्लेख गर्दै राष्ट्रिय स्वतन्त्र पार्टीलेसमेत सिद्धान्तको आधारमा यस्तो निर्णयको विरोध गर्न सक्नुपर्ने धारणा राख्नुभयाे। प्रहरीको मनोबल गिराउने कार्यले देशमा शान्ति–सुरक्षा कायम हुन नसक्ने बताउँदै उहाँले सरकारका गतिविधि सुरक्षा निकायको मनोबल बढाउनेतर्फ केन्द्रित नभएको आरोप लगाउनुभयाे ।

लोकप्रियतावाद लोकतन्त्रको विकल्प नभई अराजकतावादतर्फ धकेल्ने खतरा भएको उल्लेख गर्दै पोखरेलले अहिले पुरानो र नयाँ पुस्ताबीच कृत्रिम द्वन्द्व सिर्जना गरी समाज र देशलाई विभाजन गर्ने प्रयास भइरहेको महासचिव पोखरेलले बताउनुभयाे। ‘नेपाली समाज सधैँ पुस्तागत सहकार्यबाट अघि बढेको हो’, महासचिव पोखरेलले भन्नुभयाे, ‘विखण्डनले राष्ट्र कमजोर बनाउँछ, एकताले मात्रै समृद्धिको बाटो खोल्छ ।’

राजनीतिक स्थायित्वबारे बोल्दै पोखरेलले दलहरू बलियो भए मात्र लोकतन्त्र बलियो हुने स्पष्ट पार्नुभयाे । उहाँले नेपाली कांग्रेसलाई समयमै सचेत भएर आन्तरिक एकता मजबुत बनाउन सुझाव दिनुभयाे। संविधान र संसद् पुनःस्थापनाको बहसमा एमालेको धारणा स्पष्ट रहेको उल्लेख गर्दै उनले लोकतान्त्रिक मान्यतालाई सम्मान गर्दै निर्वाचनमार्फत् निकास खोज्न एमाले तयार रहेको बताउनुभयाे ।

नेपालको सार्वभौमसत्ता र भौगोलिक अखण्डतामाथि भइरहेका षड्यन्त्रविरुद्ध देशभक्त शक्तिहरू एकजुट हुनुपर्ने आवश्यकता औँल्याउँदै महासचिव पोखरेलले लोकतन्त्र, शान्ति–सुरक्षा र कानुनी राजमाथि गम्भीर चुनौती बढ्दै गएको भन्दै राज्यलाई संवेदनशील र जिम्मेवार बन्न आग्रह गर्नुभयाे ।

महासचिव पोखरेलले नेपालको पुरानो लोकतान्त्रिक पार्टी नेपाली कांग्रेस टुक्रिनु दुःखद् भएको टिप्पणी गर्दै लोकतान्त्रिक आन्दोलनका लागि यो नकारात्मक पक्ष भएको बताउनुभयाे। ‘राजनीतिक दल कमजोर हुँदा लोकतन्त्र र राज्य दुवै कमजोर हुन्छन्”, उनले भने, “बलिया राजनीतिक दलहरूले मात्रै बलियो राज्य निर्माण गर्न सक्छन् ।’ महासचिव पोखरेलले कांग्रेसलाई अन्तरसंघर्षबाट एकतामा फर्किन ढिलाइ नगर्न आग्रह गर्नुभयाे।

महासचिव पोखरेलले आमनिर्वाचनको सन्दर्भमा सरकार निर्वाचनको वातावरण बनाउन असफल भएको आरोप लगाउनुभाे। माघ ६ गते उम्मेदवारी घोषणा भइसकेको भए पनि शान्ति–सुरक्षाको प्रत्याभूति हुन नसकेको उहाँको भनाइ थियो ।

शान्ति–सुरक्षाको अवस्था कमजोर रहेको उल्लेख गर्दै उनले प्रहरीको मनोबल बढाउनु मुख्य आवश्यकता भएको बताउनुभयाे । “प्रहरी हत्या गर्ने, हतियार लुट्ने र कार्यालय ध्वस्त बनाउनेले दण्ड नपाउँदासम्म पूर्ण शान्ति–सुरक्षा सम्भव हुँदैन”महासचिव पोखरेलले भन्नुभयाे। राज्य नागरिकको भरोसा भएको उल्लेख गर्दै अपराधमा संलग्नहरू राज्यसँग डराउने अवस्था नबन्दासम्म समाजमा अराजकता फैलिरहने चेतावनी दिनुभयाे ।

महासचिव पोखरेलले आन्दोलनका क्रममा लुटिएका हतियार र कैदीबारे छानबिन गर्नुपर्ने, राजनीतिक दलहरू जनताबीच निर्वाध रूपमा जान पाउने वातावरण निर्माण गर्नुपर्ने बताउनुभयाे। एमालेले संगठित रूपमा गतिविधि नबढाउँदा पनि समाजमा शान्ति कायम गर्न सहयोग पुगेको र अन्य दलहरूलाई पनि गतिविधि सञ्चालन गर्न मद्दत भएको उहाँको दाबी थियो ।

अन्तर्राष्ट्रिय सन्दर्भ उल्लेख गर्दै महासचिव पोखरेलले विश्व व्यवस्थामा हलचल देखिएको र संयुक्त राष्ट्रसंघको संरचना कमजोर पार्ने प्रयासले नेपाल जस्तो संवेदनशील मुलुक सतर्क हुनुपर्ने बताउनुभयाे ।’आधुनिक विश्वको आधार अन्तर्राष्ट्रिय एकता हो, तर आज विश्वव्यवस्था खलबलिएको छ’, महासचिव पोखरेलले भन्नुभयाे। संविधान “घाइते” बनाइएको अवस्थामा संसद पुनःस्थापनाको बाटोमा जानु आजको आवश्यकता भएको उनको भनाइ थियो ।

चुनाव हुने अवस्था आए एमाले निर्वाचनबाट नभाग्ने र जनादेशबाट मुलुकलाई व्यवस्थित गर्न तयार रहेको महासचिव पोखरेलले स्पष्ट पार्नुभयाे। पार्टी अद्यावधिक हुने प्रक्रियाबारे बोल्दै महासचिव पोखरेलले राजनीतिक दल पुराना–नयाँ नभई नीति र नेतृत्व अद्यावधिक गर्ने आधारमा नयाँ हुने बताउनुभयाे । ‘रास्वपाभन्दा एमाले बढी अद्यावधिक नयाँ पार्टी हो’, महासचिव पोखरेलले भन्नुभयाे । पपुलिजमलाई लोकतन्त्र नभई अराजकतावादको संज्ञा दिँदै यसले लोकतन्त्रलाई खतरातर्फ धकेल्ने चेतावनी दिनुभयाे।

आमनिर्वाचनको विषयमा एमाले छलफलमै रहेको जनाउँदै उनले १६५ सिटमै उम्मेदवार तय गरेर अघि बढ्ने तयारी रहेको बताए । केही क्षेत्रमा सहकार्यका लागि संवाद भइरहेको र विप्लव समूह तथा प्रगतिशील दलहरूले एमालेसँग सहकार्यको इच्छा व्यक्त गरेको पनि उनले जानकारी दिए ।

जिल्ला अध्यक्ष सुधासुमन ढकालको अध्यक्षतामा भएको पत्रकार सम्मेलनमा एघारौँ महाधिवेशनबाट निर्वाचिन केन्द्रीय सदस्य र आयोगका सदस्यहरुलाई सम्मान गरिएको थियो । जिल्ला उपाध्यक्ष विमल योगीको स्वागत मन्तव्यबाट सुरु भएको कार्यक्रमको सञ्चालन सचिव निमुसंगम घर्तीले गरेका थिए ।