काठमाडौं-नेकपा (एमाले)का सचिव तथा बागमती प्रदेशका संयोजक महेश बस्नेतले अहिले देशमा चुनावी वातावरण नरहेको बताउनुभएको छ। बिहीबार आयोजित पत्रकार सम्मेलनमा बोल्दै सचिव बस्नेतले एमालेले चुनावमा भाग नलिने भनेर कहिल्यै नभनेको स्पष्ट पार्नुभएको हो।

सचिव बस्नेतले भन्नुभयो, ‘एमालेले चुनावमा भाग लिन्छ र ? भन्ने प्रश्नहरु आइरहेका छन्। हामीले चुनावमा भाग लिँदैनौं भनेर कहिले पनि भनेका छैनौं। अहिले चुनावको वातावरण छैन भन्ने हाम्रो कुरा हो। अहिले पनि प्रहरी र प्रशासनको मनोबल कमजोर छ। सेनाको मनोबल कमजोर छ, प्रहरीहरु घाइते छन्, चौकीहरु जलेका छन्, लुटिएका हतियाहरु फिर्ता आएका छैनन्। भागेका कैदी अझै पनि पक्राउ परेका छैनन्। अपराधिक गतिविधि अहिले पनि बढिरहेको छ।’

सचिव बस्नेतले प्रहरी, प्रशासन र सेनाको मनोबल कमजोर भएको दाबी गर्दै प्रहरीहरू घाइते रहेको, चौकीहरू जलेको, हतियार लुटिएको र ती अझै फिर्ता नआएको बताउनुभयो। भागेका कैदीहरू अझै पक्राउ नपरेको र अपराधिक गतिविधि बढिरहेको उहाँको भनाइ थियो।

सचिव बस्नेतले पछिल्लो राजनीतिक घटनाक्रमप्रति पनि आलोचना गर्नुभयो। वर्तमान शुसीला कार्की नेतृत्वको सरकारले आफूलाई नारीको सरकार भन्ने गरे पनि व्यवहारमा सुधार नदेखिएको उहाँको आरोप छ।

सचिव बस्नेतले कुलमान घिसिङले राजीनामा दिनु ठूलो जनदबाब र रवि लामिछानेसँगको टसलका कारण भएको दाबी गर्दै त्यसबाहेक अन्य मन्त्रीहरूको चालचलनमा सुधार नदेखिएको बताउनुभयो।

सचिव बस्नेतले भन्नुभयो, ‘राजनीतिक घटनाक्रम थप बढीरहेका छन्। अदालत भन्दा पनि न्याय जलेको छ अहिले। शुसीला कार्कीको वर्तमान सरकारले आफूलाई नारीको सरकार भन्छ। निकै ठूलो जनदवाबपछाडि र रवि लामिछानेहरुको टसलका कारणले कुलमान घिसिङले राजीनामा दिए। त्यो बाहेक अरु मन्त्रीहरुको चालामाला सुध्रिएको देखिएन।’

युवा पुस्तालाई अघि ल्याउनुपर्ने र पुराना दल तथा नेताहरूको काम छैन भन्ने खालका अभिव्यक्तिहरू एमाले कमजोर बनाउन र रवि लामिछाने पक्षलाई बलियो बनाउने रणनीतिक चाल भएको सचिव बस्नेतको आरोप छ।

सचिव बस्नेतले भन्नुभयो, ‘शुसीला कार्कीको सरकारको अभिव्यक्तिहरु हेर्दा युवा पुस्तालाई ल्याउनुपर्छ, पुराना दलहरुको काम छैन, पुराना नेताहरुको काम छैन भन्ने लगायतका अभिव्यक्तिहरु जे आइरहेका छन् ती चाहीं घुमाई फिराई एमालेलाई कमजोर बनाउने र रवि लामिछानेहरुलाई बलियो बनाउने एउटा चालबाजी भित्रको अभिव्यक्तिहरु हुन्।